हामी सबैकाे संसारन्यूज

साउन २४, काठमाडौं । तत्कालिन नेपाल कम्युनिष्ट पार्टी (नेकपा)को विवाद समाधानमा सक्रिय देखिएकी राष्ट्रपति विद्यादेवी भण्डारी पछिल्लो समय एमालेको विवाद मिलाउन पनि सक्रिय भएकी छिन् । उनले विशेषतः असन्तुष्ट पक्ष र मध्यमार्गी पक्षका नेताहरुलाई बोलाउँदै सुझाब दिन थालेकी छिन् ।

पछिल्लो समय वारपारको अवस्थामा पुगेको एमाले विवादमा उनले दोस्रो तहका नेताहरुलाई बोलाउँदै सम्झाउँदै गर्न थालेकी छिन् । जसअनुसार शनिबार मात्रै माधवकुमार नेपाल पक्षमा देखिएका नेता भीम रावललाई बोलाएर छलफल गरेकी छन् । शनिबार राती भण्डारी र रावलबीच झण्डै ३ घण्टासम्म छलफल चलेको बुझिएको छ ।

यसअघि भण्डारीले एमालेमा मध्यमार्गी भूमिकामा देखिएका नेताहरु सुवास नेम्वाङ, विष्णु पौडेल, योगेश भट्टराईलगायतलाई बोलाउँदै सम्झाउँदै गरेकी थिइन् ।

ओलीसँगको छलफल पछि नेताहरुलाई फकाउँदै भण्डारी

सर्वोच्चको आदेशपश्चात प्रधानमन्त्रीबाट बाहिरिएका ओली गत साउन ८ मा भण्डारीसँग परामर्श लिन शितल निवास पुगेका थिए । शेरबहादुर देउवालाई विश्वासको मत दिने नेताहरुलाई सोधिएको स्पष्टीकरणमा आम माफी दिने घोषणा गरेका ओली परामर्श लिन शितल निवास पुगेका थिए ।

त्यसयता भण्डारी र ओलीबीच प्रत्यक्ष भेटवार्ता भएको छैन् । तथापी अप्रत्यक्ष छलफल भने नियमित भईरहेको बताईन्छ ।

एमाले विवादमा दुवै पक्षले राखेका अडानहरु निकास दिने खालका छैनन् । तथापी माधव पक्षमा देखिएका तर एमाले विवादमा मध्यमार्गी भूमिका खेलिरहेका नेताहरुको भूमिका भने ओली पक्षका लागि सन्तोषप्रद्र्धक छ ।

बताइएअनुसार ओलीसँगको छलफलपश्चात भण्डारीले मध्यमार्गी नेताहरुसँगको छलफललाई तिव्रता दिएकी हुन् । ओलीले माधव नेपालसहित केहि नेतालाई छाडेर एमाले एकताको प्रयास गरिरहेका छन् ।

माधव पक्षलाई ‘साईज’मा ल्याउने उपायको खोजी

माधव पक्षले एमाले कार्यदलले बनाएको १० बुँदे सहमतिभन्दा माथिबाट सहमति हुनुपर्ने अडान लिईरहेको छ । शुक्रबार सम्पन्न माधव पक्षीय केन्द्रीय समिति बैठकले १० बुँदे सहमति अपूर्णं भएको निष्कर्ष निकाल्दै अन्य मागहरु अगाडि सारेको हो ।

माधव पक्षले सम्मानजनक एकतासहित पार्टीमा दुई अध्यक्ष हुनुपर्ने माग राखेको छ । साथै दुवै अध्यक्षको बराबरी हैसियतमा हस्ताक्षर चल्ने व्यवस्था हुनुपर्ने माग राखेको छ । माधव पक्षले आफुँले बनाएका समानान्तरक कमिटीलाई मान्यता दिई कमिटीमा रहेका नेताहरुलाई सम्मानजनक रुपमा ठाउँ दिनुपर्ने पनि माग राखेको छ ।

माधव पक्षको बैठकले उठाएका यी मागहरुबारे एक साताभित्र निकास खोज्ने कार्यदलका सदस्यहरुले प्रतिबद्धता जनाएका छन् । तर, यी मागप्रति एमालेको ओली पक्ष पूर्णं असहमत छ । माधव पक्षका मध्यमार्गी नेताहरुलाई शितल निवासले बोलाएर भेट्नुमा यी कारण पनि जोडिएको धेरैको बुझाई छ ।