हामी सबैकाे संसारन्यूज

‘द भ्वाइस अफ नेपाल सिजन ३’ को उपाधि विजेता किरण गजमेरले आफूले पाएको पुरस्कारको रकमले शरणार्थी शिविरका नागरिकको प्रयोगको लागि एम्बुलेन्स खरिदि गरिदिने बताएका छन् ।

उनले उक्त उपाधिका साथै प्राप्त पुरस्कार रकम नगद २५ लाख १ हजार आमालाई दिएर २४ लाख एम्बुलेन्स खरिदका लागि सहयोग गर्ने बताएका हुन् ।

शनिवार मध्यराति सबैभन्दा बढी भोट ल्याएर विजेता बनेका गजमेरले विगतमा आफुले पनि शरणार्थी जीवन बिताउनु परेको र उपचार नपाएकै कारण हजुरआमा गुमाउनु परेको स्मरण गर्दै यस्तो घोषणा गरेका हुन् ।

‘ जितेको २५ लाख मध्ये १ हजार आमालाई दिन्छु । अरु पैसाले दुईवटा एम्बुलेन्स सहयोग गर्छु र बाँकी रहेको पैसाले कोरोना विरुद्धको खोप लगाउन बन्चित भएकालाई सहयोग गर्छु ।’ विजेताको उपाधि हात पारेपछि उनले भने ।

झापाको खुदुनाबारीस्थित भुटानी शरणार्थी शिविरमा जन्मिएका गजमेर हाल अमेरिकामा बस्दै आएका छन् ।

टिम प्रमोदबाट फाइनलमा ‘द भ्वाइस अफ नेपाल सिजन ३’ को फाइनलमा पुगेका गजमेरले टिम राजुबाट फाइनलमा प्रवेश गरेकी बागलुङकी तारा श्रीष मगर र टिम दीपबाट दार्जिलिङका आर्यन तामाङ र टीम तृष्णाबाट फाइनलमा प्रवेश गरेका ज्वाला राईलाई पछि पार्दै जित हासिल गरेका हुन् । फाइनलिष्टमा प्रवेश गरेका तीनैजनालाई द भ्वाइसको ट्रफि प्रान गरिएको छ ।