हामी सबैकाे संसारन्यूज

साउन २७, काठमाडौं । नेपाल विद्युत प्राधिकरणका नवनियुक्त कार्यकारी निर्देशक कुलमान घिसिङले आफुँ निकै ठुलो चुनौतीलाई स्वीकार गरेर दोस्रो पटक नियुक्ति लिएको बताएका छन् । पदबहाली पछि बुधबार प्राधिकरणमा आयोजित स्वागत तथा शुभकामना आदानप्रदान कार्यक्रमलाई सम्बोधन गर्दै उनले यस्तो बताएका हुन् ।

‘दोस्रो इनिङ स्वीकार गरेर मैले ठूलो चुनौती स्वीकार गरेको छु, यो मेरो जीवनकै सबभन्दा ठूलो चुनौती जस्तो लाग्छ’,उनले भने, ‘यो चुनौतीभन्दा अरु केही हुनेछैन।’

सबैले सहयोग गरेमात्रै सफल हुनसक्ने उनको भनाई छ । ‘मेरो व्यक्तिगत जीवनमा यो भन्दा ठूलो चुनौति केही होइन’, उनले थपे, ‘यो चुनौति म एक्लैले सामना गर्न सक्ने होइन । हामी सबै मिलेर गर्ने हो ।’

उनले सरकारले दिएको जिम्मेवारीलाई अपेक्षाकृत हिसाबले पुरा गर्ने पनि प्रतिबद्धता जनाए । उनले भने, ‘सरकारले दिएको जिम्मेवारी दिएको र मन्त्रीज्यूले दिएको निर्देशनअनुसार ऊर्जा क्षेत्रलाई हाइटमा लैजाने प्रतिबद्धता जाहेर गर्न चाहन्छु ।’

घिसिङ्ग गत वर्षको भदौ अन्तिममा प्राधिकरणबाट ४ वर्षे कार्यकाल सकेर बिदा भएका थिए । उनलाई सोमबार बसेको मन्त्रिपरिषद बैठकले दोस्रो पटक विद्युत प्राधिकरणको कार्यकारी निर्देशकमा नियुक्त गरेको हो ।