Sansar News
२८ साउन, काठमाडौं । सरकारले विश्वविद्यालय तहका परीक्षार्थीहरुलाई प्रवेशपत्रका आधारमा खोप दिने भएको छ । जनसंख्या तथा स्वास्थय मन्त्रालयले काठमाडौं लगायत सबै प्रदेशका परीक्षा दिने विद्यार्थीलाई प्रवेश पत्रका आधारमा खोप लगाइने निर्णय गरी कार्यान्वयनका लागि सातै प्रदेशका जिल्ला स्वास्थ्य कार्यालयलाई निर्देशन समेत पठाएको छ ।
स्वास्थ्य राज्यमन्त्री उमेश श्रेष्ठले पनि ट्विटमार्फत सो कुराको जानकारी गराएका छन् । मन्त्री श्रेष्ठले सञ्जालमा भनेका छन् ‘विश्वविद्यालयका परीक्षार्थीका लागि काठमाडौंमा मात्र नभई सबै प्रदेशबाट कोभिशिल्ड वा भेरोसेलको खोप उपलब्ध गराउने निर्णय भएको छ । प्रदेशले तोकेका खोपकेन्द्रबाट प्रवेशपत्र देखाएर खोप लिन सक्नुहुनेछ ।’
परीक्षा दिने विद्यार्थीलाई काठमाडौं उपत्यकामा नेपाली सेना, नेपाल प्रहरी तथा सशस्त्र प्रहरी अस्पताल र चक्रपथस्थित राधास्वामी आइसोलेसन केन्द्रमा खोप लगाइने बताएका छन् ।
उनले भने, ‘विश्वविद्यालय तहका परीक्षार्थीहरूले प्रवेशपत्रका आधारमा काठमाडौं उपत्यकामा नेपाली सेना, नेपाल प्रहरी तथा सशस्त्र प्रहरी अस्पताल र चक्रपथस्थित राधास्वामी आइसोलेसन केन्द्रमा कोभिड–१९ विरुद्ध खोप प्राप्त गर्न सक्नुहुन्छु, ‘यसबाहेक सबै प्रदेशबाट परीक्षार्थीहरूलाई खोप वितरणको व्यवस्था छ।’
वि.सं.२०७८ साउन २८ बिहीवार ०९:५१ मा प्रकाशित
