Sansar News
२९ साउन, काठमाडौं । बेलायतमा भइरहेको भूतपूर्व गोर्खाहरुको आन्दोलन तथा आमरण अनशनप्रति नेकपा (माओवादी केन्द्र) का वरिष्ठ नेता तथा प्रवक्ता नारायणकाजी श्रेष्ठले ऐक्यबद्धता जनाएका छन् ।
नेता श्रेष्ठले यो विषय बेलायती सेनामा कार्यरत नेपालीहरुको ब्यक्तिगत सरोकारको बिषय मात्र नभएर नेपालको स्वाभिमानको बिषय पनि रहेको भन्दै नेपाल सरकारले नै बेलायत सरकारसँग वार्ता गरेर नेपाली भएकै कारणले अपमानित भएका र ठगिएका “बृटिश गोर्खा सैनिक’ को जायज माग पूरा गर्न शिघ्र पहल गर्नुपर्ने बताएका छन् ।
नेता श्रेष्ठले भनेका छन्–बेलायती सेनामा कार्यरत रहेका वा सेवा गरेका नेपालीहरुलाई नेपाली भएकै कारणले गरिएको भेदभाव र शोषणका बिरुद्ध ‘गोर्खा सैनिक’ हरुले लामो समयदेखि संघर्ष गर्दै आइरहेका छन् र केही उपलब्धि पनि हाँसिल गरेका छन् । तर अझै पनि पूर्ण सफल भैसकेको छैन । त्यसैले संघर्ष जारी राख्ने क्रममा केही दिनदेखि लण्डनमा अनसन बसिरहेका छन् । त्यसप्रति जोडदार ऐक्यबद्धता प्रकट गर्दछु ।
यो बेलायती सेनामा कार्यरत नेपालीहरुको ब्यक्तिगत सरोकारको बिषय मात्र नभएर नेपालको स्वाभिमानको बिषय पनि हो । त्यसैले यसबारेमा नेपाल सरकारले नै बेलायत सरकारसँग वार्ता गर्नुपर्छ र नेपाली भएकै कारणले अपमानित भएका र ठगिएका “बृटिश गोर्खा सैनिक“ को जायज माग पुरा गर्न शिघ्र पहल गर्नु पर्दछ ।’
समान अधिकार र पेन्सनको माग राखि १७ दिन बेलायती प्रधानमन्त्री निवास नजिक धर्ना कार्यक्रम गरेका उनीहरुको माग सुनुवाई नभएपछि गत शनिवारदेखि आमरण अनशन बसेका छन् ।
बेलायत जस्तो देशमा मानव अधिकार हनन गरिएको भन्दै एनआरएनएको गम्भीर ध्यानाकर्षण
वि.सं.२०७८ साउन २९ शुक्रवार ०८:१४ मा प्रकाशित
