Sansar News
२९ साउन, काठमाडौँ । कोभिड १९ विरुद्ध खोप लगाएको क्यूआर कोडसहितको प्रमाणपत्र अब अनलाइनबाटै लिन मिल्ने भएको छ।
शुक्रबार गृह मन्त्रालयले एक विज्ञप्ति जारी गर्दै खोप प्रमाणीकरण आवश्यक पर्ने व्यक्ति स्वयम्ले स्वास्थ्य तथा जनसंख्या मन्त्रालयको https://vaccine.mohp.gov.np अनलाइन प्रणालीमार्फत् खोप लगाएको विवरण प्रविष्टि गरी आवश्यक कागजात अपलोड गरी प्रमाणपत्र लिन मिल्ने जनाएको हाे।
अनलाइनबाट प्रमाणपत्र लिनका लागि खोप कार्ड, राहदानी नम्बर अनलाइन फार्ममा रहेको कबुलियतनामाको नमूना अपलोड गरी क्युआर कोडसहितको प्रमाणीकरण प्राप्त गर्न सकिने बताइएको छ ।
आवश्यक डकुमेन्टहरु अपलोड भएपछि उल्लेखित कागजात स्वास्थ्य सेवा विभाग, परिवार कल्याण महाशाखाको अनलाइन प्रणालीबाटै स्वतः भेरिफाई हुनेछ। यस विषयमा कुनै समस्या भएमा जनस्वास्थ्य अधिकृत दिपक झालाई मोबाइल नम्बर ९८४३२८४३५२ मा सम्पर्क गर्न भनिएको छ।
स्वास्थ्य तथा जनसंख्या मन्त्रालयले क्युआर कोडसहितको प्रमाणपत्र अनिवार्य भएका देश जान लागेका व्यक्तिहरुमा क्युआर कोडसहितको प्रमाणपत्र प्राप्त भएपछि मात्र टिकट लिनका लागि अनुरोध गर्दै आएको छ ।
वि.सं.२०७८ साउन २९ शुक्रवार १९:४८ मा प्रकाशित
