हामी सबैकाे संसारन्यूज

१ भदौ, डोटी । चाड पर्व नजिकिएसँग निषेधाज्ञामा थप कडाइ गरिएको छ ।

जिल्लामा स्थानीय पर्व तथा चाड नजिकिएको र कोरोना जोखिम बढ्न सक्ने जनाउँदै स्थानीय प्रशासनले निषेधाज्ञामा थप कडाइ गरेको हो । जिल्लामा अब एक महिनासम्म निषेधाज्ञा लागू गर्ने निर्णय गरिएको हो ।

जिल्ला प्रशासन कार्यालयबाट जारी निषेधाज्ञाअनुसार आज मध्यरातबाट लागू हुने निषेधाज्ञा यही भदौ ३१ गते राति १२ बजेसम्म लागू हुने भनिएको छ । यसैगरी बजार–पसल बिहान ५ देखि बेलुकी ५ बजेसम्म मात्रै खुल्ने भएका छन् । यसैगरी होटेल तथा रेस्टुरेन्ट स्वास्थ्य सुरक्षाका मापदण्डको पालना गरी साँझ ७ बजेसम्म मात्रै सञ्चालन गर्न सकिने आदेशमा उल्लेख गरिएको छ ।

स्थानीय मेला, महोत्सव, पार्टी, भोजलगायत भीडभाड हुने गतिविधिमा भने पूर्ण रोक लगाइएको निमित्त प्रमुख जिल्ला अधिकारी किरण जोशीले बताए । उनले भने, “जिल्लामा स्थानीय चाडबाड नजिकिएका र कामका लागि भारत गएका नागरिकहरु पनि फर्किने समय भएकाले बढी भीडभाड हुँदा कोरोना जोखिम बढ्न सक्ने भएकाले हामीले निषेधाज्ञामा केही कडाइ गरेका छौँ, नियमको सबैले पालना गर्नु जरुरी छ ।”

यसैगरी कोरोना सङ्क्रमणको खतरा हुने तथा भीड लाग्ने शपिङ मल, मनोरञ्जनस्थल, पार्क, सैलुन, ब्युटीपार्लर, जिमखाना, समूहमा खेलिने खेल तथा पुस्तकालय भने खोल्न रोक लगाइएको छ ।

कोभिड–१९ सङ्क्रमण नियन्त्रणका लागि जिल्लामा जारी निषेधाज्ञा आज १३औँ पटक थप भएको हो । स्वास्थ्य सुरक्षाका मापदण्डको पालना गर्दै सवारी साधन भने सञ्चालन गर्न अनुमति दिइएको छ । विवाहमा १० जनाभन्दा कम जन्ती लिई जान सकिने, स्वास्थ्य सुरक्षाका मापदण्डको पालना गरी जारी परीक्षा सञ्चालन गर्ने आदेशमा उल्लेख छ ।

यसअघिसम्म बजार–पसल साँझ ८ बजेसम्म सञ्चालन गर्न दिइएको भने पनि अब उक्त समय घटाइएको छ । जिल्लामा कोभिड–१९ सङ्क्रमण दर घटेको तथ्याङ्कमा देखिए पनि स्थानीय चाडबाड आएकाले सङ्क्रमणको खतरा बढ्नेतर्फ सजगता अपनाउँदै निषेधाज्ञामा केही कडाइ गरिएको निमित्त प्रजिअ जोशीले जानकारी दिए । कोरोनाबाट हालसम्म जिल्लामा ११ को मृत्यु भएको छ ।