हामी सबैकाे संसारन्यूज

६ भदौ , काठमाडौँ । नेपालमा आत्महत्याको घटना दैनिकरुपमा बढ्न थालेको छ ।

एक तथ्यांकका अनुसार एकदिनमा झण्डै १९ जनाले आत्महत्या गर्ने गरेका छन् । उक्त तथ्याङ्क अनुसार प्रत्येक १ घण्टा २० मिनेटमा एक आत्महत्याको घटना घट्ने गरेको छ ।

प्रहरी प्रधान कार्यालय नक्सालले जारी गरेको तथ्याङ्क अनुसार आर्थिक वर्ष २०७४/७५ मा दैनिक आत्महत्या गर्नेको संख्या १४ देखि १५ जनाको हाराहारीमा रहेको थियो । तर, आर्थिक वर्ष २०७७/७८ सम्म आइपुग्दा दैनिक आत्महत्या गर्नेको संख्या १९ भन्दा बढी पुगेको छ ।

आर्थिक वर्ष २०७७/७८ को तथ्याङ्क अनुुसार ५ हजार ७२० जनाले झुण्डिएर आत्महत्या गरेका छन् भने १ हजार २७६ जनाले विष सेवन । ४६ जनाले हाम फालेर, ३६ जनाले पानीमा डुबेर तथा १९ जनाले आफैले आफैलाई आगो लगाएर आत्महत्या गरेको प्रहरीको तथ्यांकमा जनाइएको छ ।
नेपालमा आत्महत्याका मुल कारकतत्व आर्थिक, सामाजिक, पारिवारिक र मानसिक समस्या मान्ने गरिएको छ ।
पछिल्ला समय कोरोनाका कारण देशको आर्थिक अवस्था जर्जर भएको र रोजगारीको अभाव तथा आर्थिक समस्या परेर मानसिक रुपमा पीडा भोगेकाहरुबाट पनि आत्महत्या गरेको पाइएको छ ।

विश्व स्वास्थ्य संगठनका अनुसार आत्महत्या गर्ने विश्वका विभिन्न देशहरुमा नेपाल ७ औं स्थान र महिलाको तथ्यांकमा नेपाल तेस्रो नम्बरमा पर्दछ ।