हामी सबैकाे संसारन्यूज

भदौ ७, काठमाडौं । पार्टी विभाजन गर्न हौस्याउने तर अन्तिम समय धोका दिएका भीम आचार्य प्रदेश १ को मुख्यमन्त्री बन्न सहयोग माग्दै कोटेश्वर पुगेका छन् । शनिबार बिहान उनी एमालेबाट अलग भएका नेता माधवकुमार नेपाललाई भेट्न उनकै निवास कोटेश्वर पुगेका हुन् ।

नेपाल निकट स्रोतले बताएअनुसार भेटमा आचार्यले प्रदेश १ को मुख्यमन्त्री बन्नका निम्ति नेता नेपाललाई सहयोग गर्न आग्रह गरेका थिए । उनले आफ्नो पक्षमा पार्टी अध्यक्ष केपी शर्मा ओली पनि सहमत भएको भन्दै नेता नेपालसँग सहयोग मागेका थिए । एमालेको एकल बहुमत रहेको प्रदेशमा अन्य दललाई भित्र्याउन नहुने तर्क आचार्यको थियो ।

नेता नेपालले भने उनको प्रस्तावलाई सिधै अस्वीकार गरिदिएका थिए । नेपाल निकट स्रोतले बताएअनुसार अन्तिम समय धोका दिएका आचार्यप्रति नेता नेपाल निकै कडा रुपमा प्रस्तुत भएका थिए ।

यसअघि औपचारिक रुपमा एमालेबाट अलग हुँदै नयाँ दल दर्ताको तयारीमा जुटिरहेका बेला नेता आचार्यले माधव नेपालको पक्षमा १० प्रतिशत पनि मान्छे नजाने टिप्पणी गरेका थिए । उनले नेता नेपालले व्यक्तिगत स्वार्थ केन्द्रित रहेर पार्टी विभाजन गराएको भन्दै आलोचना गरेका थिए ।

तर, माधव छाडेर एमाले तिर फर्किएका उनी मुख्यमन्त्रीको प्रस्ताव आएसँगै भने फकाउन पुगेका हुन् । हाल प्रदेश १ मा माधव पक्षका नेतालाई मुख्यमन्त्री बनाउने तयारी गठबन्धनको छ । नेपाल पक्षले गठबन्धनको सहयोगमा नेता राजेन्द्र राईलाई मुख्यमन्त्रीका रुपमा अघि सार्ने तयारी गरेको छ ।