Sansar News
भदौ ८, काठमाडौं । माधवकुमार नेपाल नेतृत्वको प्रस्तावित नेकपा (एकीकृत समाजवादी) पार्टीले अन्तरिम विधान तयार पारेको छ । चन्द्रागिरी रिसोर्टमा आयोजित पार्टीका केन्द्रीय सदस्य र सांसदहरुको बैठकमा विधान वितरण गरिएको थियो ।
अन्तरिम विधानअनुसार एकीकृत समाजवादी पार्टीको केन्द्रीय पदाधिकारी १७ सदस्यीय हुनेछ । जहाँ एक अध्यक्ष, एक वरिष्ठ नेता, सात उपाध्यक्ष, एक महासचिव, दुई उपमहासचिव र सात सचिव रहने व्यवस्था गरिएको छ । ११५ पूर्णं र ३६ वैकल्पिक गरी पार्टीको १५१ सदस्यीय केन्द्रीय समिति रहने विधानमा उल्लेख छ ।
केन्द्रीय कमिटी दुई महाधिवेशनबीच पार्टीको सर्वोच्च कार्यकारी संस्था हुने विधानमा उल्लेख छ । केन्द्रीय कमिटीको कूल सदस्य सङ्ख्याको कम्तिमा एक तिहाइ अर्थात् ३३ प्रतिशत सदस्य महिला अनिवार्य हुनेछन् ।
केन्द्रीय कमिटीभित्र केन्द्रीय पदाधिकारी र स्थायी कमिटी सदस्यसहित ५१ सदस्यीय पोलिटब्यूरो र पदाधिकारीसहित २१ सदस्यीय स्थायी कमिटी रहने व्यवस्था गरिएको विधान सो पार्टीले पारित गरेको छ ।
यस्तो छ नेकपा (एकीकृत समाजवादी )को अन्तरिम विधान
वि.सं.२०७८ भदौ ८ मंगलवार १५:४१ मा प्रकाशित
