हामी सबैकाे संसारन्यूज

भदौ १०, काठमाडौं । बागमती पछि नेकपा एमालेले प्रदेश १ मा पनि मुख्यमन्त्री परिवर्तन गर्ने भएको छ । माधवकुमार नेपाल पक्ष छाडेका नेता भीम आचार्यलाई प्रदेश १ को मुख्यमन्त्री बनाउन लागिएको हो ।

बताइएअनुसार आज बस्ने संसदीय दलको बैठकमा शेरधन राईले राजीनामा दिने र आचार्यलाई दलको नेता बनाउने तयारी छ ।

हालसम्म प्रदेशसभामा बहुमत अवस्थामा देखिएको एमालेले मुख्यमन्त्रीमा दाबी गर्न पाउँछ । पार्टी विभाजन भएपनि प्रदेश सभा सदस्यहरुले पार्टी निक्र्यौल नगरेको कारण प्रदेश सभामा ५१ सदस्यसहित एमाले बहुमत अवस्थामै छ ।

९२ सदस्यीय प्रदेशसभामा नयाँ सरकार गठनका लागि ४७ सांसदको समर्थन भए पुग्छ । प्रदेशमा कांग्रेसका २१, माओवादी केन्द्रका १५, जनता समाजवादी पार्टीका ३, राप्रपा र संघीय लोकतान्त्रिक मञ्चका १/१ सांसद छन् ।

माधव पक्षलाई अफरै अफर

एमालेमा ५१ जना सांसद छन् जसमध्ये हालसम्म ८ जना सांसद मात्रै माधव पक्षमा खुलेका छन् । तर, ती सांसदलाई भीम आचार्यको समूहले एमाले तिरै फर्काउन मन्त्रीको अफर दिएको छ ।

बताइएअनुसार माधव पक्षमा जान खोज्ने अधिकांश प्रदेश सभा सदस्यलाई नै मन्त्रीको अफर गरिएको छ ।