हामी सबैकाे संसारन्यूज

भदौ १०, काठमाडौं । नेकपा (एमाले)मा ‘पार्टी अध्यक्ष केपी शर्मा ओली पछिको म हुँ’ भन्ने रामबहादुर थापा ‘बादल’को बरियता ९ औं नम्बरमा पुगेको छ । माधवकुमार नेपाल पक्ष छाडेका तेस्रो धारका नेताहरु एमालेमा मिसिएसँगै उनको बरियता अन्यौंलामा परेको थियो ।

माधव पक्षले बेग्लै पार्टी गठन गरेपश्चात बिहीबार बसेको पहिलो केन्द्रीय समिति बैठकमा बादललाई ९ औं नम्बरमा राखिएको छ । उनलाई संसदीय दलका उपनेता सुवासचन्द्र नेम्वाङभन्दा तलको तहमा राखिएको छ ।

बिहीबारको बैठकमा अध्यक्ष, तीन उपाध्यक्ष, महासचिव, दुई उपमहासचिव र उपनेता नेम्वाङ पछि बादलको कुर्सी छ ।

मंगलबार भएको स्थायी समिति बैठकपश्चात गरिएको फोटो शेसनमा बादललगायत अन्य नेताहरुलाई निकै पछाडि राखिएको थियो भने बुधबारको पत्रकार सम्मेलनमा पनि उनलाई अन्य स्थायी समिति सदस्य कुर्सी व्यवस्थापन गरिएको थियो ।

पोखरेलभन्दा मुनिको बरियतामा पर्दा विरोधमा उत्रिएका थिए बादल

सर्वोच्चको आदेशसँगै ब्यूँतिएको एमालेमा बादलले आफ्नो बरियता ओली पछिको भन्दै दाबा गरेका थिए । बरियताको विषयमा तत्कालिन समय एमालेमा निकै किचलो पनि उब्जिएको थियो ।

ओली पछिको म हुँ भन्ने बादललाई ओलीले मिलाई मिलाई महासचिव ईश्वर पोखरेल पछिको बरियतामा राखेका थिए । जुन समय उनले विद्रोह गर्ने पनि चेतावनी दिएको विषय बाहिर आएको थियो ।

एमाले विवाद चुलिएको बेला गत वैशाख १० मा विघटित एमालेको महाधिवेशन आयोजक कमिटीले गठन गरेको स्थायी समितिमा बादललाई पोखरेल पछाडि राखिएको थियो ।

सम्बन्धित समाचार

एमालेमा तेस्रो धारको ‘इन्ट्री’ पछि पूर्वमाओवादी समूहलाई अपमान