हामी सबैकाे संसारन्यूज

१३ भदौ, दिल्ली । भारतमा कोरोना संक्रमण पुनः बढ्न थालेको छ ।

भारतमा शनिवार ४५ हजार ६४ जना नयाँ संक्रमित थपिएका छन् । समाचार ऐजेन्सीका अनुसार भारतमा चारदिनदेखि कोरोनाबाट संक्रमित हुनेको संख्या निरन्तर बढिरहेको छ ।

त्यसैगरी शनिवार ४५७ जनाको कोरोना संक्रमितको मृत्यु भएको छ भने सोहि अवधिमा संक्रमितमध्ये ३५ हजार ८११ जना संक्रमणबाट मुक्त भएका छन् ।

भारतमा पछिल्ला केही सातायता केरलामा संक्रमित हुनेको संख्या तिब्ररुपमा बढीरहेको छ । त्यहाँ चारदिन यता प्रत्येक दिन ३० हजार भन्दा बढी संक्रमित भएको तथ्यांक सार्वजनिक भएको छ ।

केरलामा कोरोना संक्रमितको संख्या बढ्दै गएपछि आइतवारदेखि लकडाउन गरिएको छ । उक्त राज्यमा शनिवार ३१ हजार २६५ जनामा संक्रमण पुष्टि भएको थियो । साथै सोहि अवधिमा केरलामा मात्रै १५३ जनाले ज्यान गुमाएका थिए ।

भारतमा हालसम्म कोरोना संक्रमित हुनेको संख्या ३ करोड २६ लाख पुगेको छ भने ३ करोड १८ लाख संक्रमण मुक्त भएका छन् । सोहि अवधिमा ४ लाख ३७ हजारले ज्यान गुमाइसकेका छन् ।

भारतमा हाल ३ लाख ६२ हजार सक्रिय संक्रमितको उपचार भइरहेको छ ।