हामी सबैकाे संसारन्यूज

भदौ १४, काठमाडौं । मन्त्रिपरिषद विस्तार गर्दा नगर्दै प्रदेश १ का मुख्यमन्त्री भीम आचार्य सरकार जोगाउनै नसक्ने अवस्थामा पुगेका छन् । एमालेका सांसदलाई जोगाउने भन्दै शेरधन राईको राजीनामा नै गराएर मुख्यमन्त्री बनेका उनी सांसदहरु जोगाउन नसक्दा संकटमा पुगेका हुन् ।

माधवकुमार नेपाल पक्षमा देखिएका आचार्य अन्तिम समय एमालेतिरै फर्किएका थिए । एमालेतिरै फर्किएका उनी माधव पक्षमा जान खोज्ने सांसदलाई रोक्ने प्रतिबद्धतासहित राईलाई विस्थापन गर्दै गत बिहीबार पदभार सम्हालेका थिए ।

तर, मुख्यमन्त्री बनेको केहि दिनमै एमालेका १० सांसद खुलेरै माधवकुमार नेपाल नेतृत्वको नेकपा (एकीकृत समाजवादी)मा जाने घोषणा गरेसँगै उनी समस्यामा परेका हुन् । सांसद राजेन्द्रकुमार राई नेतृत्वमा १० सांसद खुलेरै माधव नेतृत्वको एकीकृत समाजवादीमा जाने सामूहिक निर्णय गरिसकेका छन् ।

राईसँगै सांसदहरु खिनु लङ्बा लिम्बू, सावित्रीकुमारी रेग्मी, कृष्णकुमारी राई, राजन राई, गणेशकुमार काम्बाङ्, सुनिताकुमारी चौधरी, सरिता थापा, उपेन्द्र घिमिरे, पदमकुमारी गुरुङ माधव पक्षमा खुलेका हुन् ।

आचार्यको पक्षमा छैन् अंकगणित

९२ सदस्यीय प्रदेशसभामा एमालेका ५१ सांसद छन् । निर्वाचन आयोगले एमाले विभाजनसँगै प्रदेश सांसद र स्थानीय तहका जनप्रतिनिधिलाई दल चुन्न भदौ २२ सम्मको समय सीमा दिएको छ । तर, दल चुन्न दिएको समय सीमा अगावै १० सांसद खुलेरै माधव पक्षमा देखिएका छन् ।

आचार्यलाई सरकार जोगाउन बहुमत संख्या ४७ सांसदको आवश्यकता पर्दछ तर, हालसम्मको अवस्थालाई हेर्दा उनको पक्षमा ४० सांसद पनि जुटाउन गाह्रो छ ।

प्रदेशसभामा कांग्रेसका २१, माओवादी केन्द्रका १५, जनता समाजवादीका ३ गरि ३९ सांसद छन् । यी तीनै दल प्रदेश १ को विपक्षी गठबन्धनमा छ । यदि माधव नेतृत्वको १० सांसद सहभागी भएमा गठबन्धनतर्फ ४९ सांसद अर्थात् सहज बहुमत पुग्नेछ ।

माधव नेतृत्वको एकीकृत समाजवादीसहित यी दलहरुले केन्द्रदेखि अन्य प्रदेशमा पनि सहकार्य गरिरहेका छन् । एमाले विभाजनसँगै बागमती र प्रदेश १ मा पनि सत्ता परिवर्तन गर्ने गठबन्धनको तयारी छ ।