हामी सबैकाे संसारन्यूज

१४ भदौ, अष्ट्रिया । एनआरएनएको युरोप क्षेत्रिय उपसंयोजकमा अष्ट्रियाबाट सागर सुवेदीले उम्मेदवारी घोषणा गरेका छन् ।

पर्वतको कुश्मा नगरपालिका ११ घर भइ १० वर्षदेखि अष्ट्रियामा रहेर पत्रकारिता क्षेत्रमा समेत सक्रिय रहेका सुवेदीले एनआरएनएको आगामी कार्यकाल २०२१–२०२३ का लागि युरोप उपसंयोजकमा उम्मेदवारी घोषणा गरेका हुन् ।

अष्ट्रियामा रहेर एनआरएनएमार्फत् सक्रिय रुपमा सामाजिक क्षेत्रमा महत्वपूर्ण भूमिका निर्वाह गर्दै आएका सुवेदी एनआरएनए अष्ट्रियाको दुई कार्यकाल सचिव भएर काम गरिसकेका व्यक्तित्व हुन् ।

संस्थाभित्र रहँदा होस् वा बाहिर रहेर विदेशमा रहने नेपालीको सुख दुःखमा सदैव साथ र सहयोग गर्दै आएका सुवेदीले गैरआबासीय नेपाली संघको रुपान्तरण अहिलेको प्रमुख मुद्दा रहेको बताउँदै गर्न नसक्ने विषयमा मतदाताका अगाडि बोल्ड नारा दिनुभन्दा गर्न सकिने विषयलाई उठाउनु राम्रो हुने आफ्नो मान्यता रहेको बताउँछन् ।

‘सोही परिबर्तनका लागी आवाज बाहिर मात्र नभएर संगठनभित्र पनि आबश्यक हुन्छ । सहि व्यक्तिलाई दिने मतले सहि गन्तब्य निर्धारण गर्दछ । सबैको सहयोगको अपेक्षामा ।’ उम्मेदवारी घोषणा गर्दै उनले भनेका छन् ।

एनआरएनएको केन्द्रीय स्वास्थ्य समितिको सदस्य समेत रहेका सुवेदीले कोरोनाका कारण विश्व नै आक्रान्त रहेका बेला सामाजिक संजालमार्फत् नेपालीहरुमा कोरोनाको संक्रमणबाट कसरी बच्ने भन्ने बारेमा जनचेतना फैलाउने काम समेत गरेका थिए ।

संघमा नयाँ ऐजेन्डा भन पनि भएका ऐजेन्डालाई कार्यान्वयन गर्नुपर्छ भन्नेमा जोड दिँदै उनी भन्छन्–‘एनआरएनएमा कुरा ठूलो गर्ने तर सिन्को नभाँच्ने प्रवृत्ति हाबी छ । अहिले संघलाई जसरी प्रयोग गरिएको छ त्यसरी प्रयोग नगरेर संघलाई संघकै रूपमा सशक्त बनाइ डायस्पोराबाट नेपाल जोड्ने काम गर्नुपर्दछ ।’ उनले भने ।