हामी सबैकाे संसारन्यूज

१४ भदौ, काठमाडौं । हाल देशैभरी ३५ हजार ७९६ जना सक्रिय कोरोना संक्रमित रहेका छन् ।

स्वास्थ्य तथा जनसंख्या मन्त्रालयका अनुसार हाल देशैभरी रहेका ३५ हजार ७९६ जना कोरोना संक्रमित मध्ये सबैभन्दा बढी बागमती प्रदेशमा रहेका छन् ।

बागमती प्रदेशमा आइतवारसम्म होम आइसोलेशनमा १३ हजार ४९ जना र संस्थागत आइसोलेशनमा ३०५२ जना रहेका छन् भने आइसीयुमा ३७२ तथा १०४ जनाको भेन्टिलेटरमा उपचार भइरहेको छ । प्रदेशमा हालसम्म ४ हजार ५९१ कोरोना संक्रमितले ज्यान गुमाइसकेका छन् ।

त्यस्तै सक्रिय संक्रमित रहेकामध्ये गण्डकी प्रदेश दोस्रो रहेको छ । प्रदेशमा आइतवारसम्म होम आइसोलेशनमा ७ हजार ६३९, संस्थागत आइसोलेशनमा ५१५ जना, आइसीयुमा ८९ र भेन्टिलेटरमा ९ जनाको उपचार भइरहेको छ । मन्त्रालयको तथ्यांक अनुसार प्रदेशमा हालसम्म १,२५० जनाको संक्रमणबाट मृत्यु भएको छ ।

त्यसैगरी प्रदेश १ मा ५ हजार ४४४ जना होम आइसोलेशनमा, ५५० जना संस्थागत आइसोलेशनमा र आइसीयुमा १०१ तथा भेन्टिलेटरमा ४१ जनाको उपचार भइरहेको छ । प्रदेशमा हालसम्म १५३२ जनाको ज्यान गएको छ ।

त्यस्तै लुम्बिनी प्रदेशमा आइतवारसम्म होम आइसोलेशनमा रहनेको संख्या २,९५६, संस्थागत आइसोलेशनमा ३८८ जना, आइसीयुमा ४९ जना र भेन्टिलेटरमा ७ जनाको उपचार भइरहेको छ । प्रदेशमा हालसम्म १६७९ संक्रमितको ज्यान गइसकेको छ ।

प्रदेश २ मा होम आइसोलेशनमा १,४११, संस्थागतमा आइसोलेशनमा १२ जना रहेका छन् भने आइसीयु र भेन्टिलेटरमा रहनेको संख्या शून्य रहेको छ । प्रदेश २ मा हालसम्म ७५७ जनाको मृत्यु भएको मन्त्रालयद्धारा जारी विवरणमा उल्लेखछ ।

त्यस्तै कर्णाली प्रदेशमा १३१७ जना होम आइसोलेशनमा रहेका छन् भने ६१ जना संस्थागत आइसोलेशनमा रहेका छन् । साथै आइसीयुमा उपचार गराउनेको संख्या ६ रहेको छ । प्रदेशमा हालसम्म ४४८ जनाले ज्यान गुमाएका छन् ।

सुदुरपश्चिम प्रदेशमा होम आइसोलेशनमा ८८३, संस्थागत आइसोलेशनमा १५०, आइसीयुमा ८ जना र भेन्टिलेटरमा ६ जनाको उपचार भइरहेको छ । प्रदेशमा हालसम्म ४५७ जनाले ज्यान गुमाएका छन् ।

नेपालमा पछिल्ला केही दिनयता कोरोनाबाट संक्रमित हुनेको संख्या क्रमश घट्दै गएको छ भने निको हुनेको संख्यामा वृद्दि भएको छ ।

मन्त्रालयका अनुसार नेपालमा हालसम्म ५० लाख ६३ हजार ५२२ जनाले दुवै मात्रा र ४० लाख ५२ हजार ७६५जनाले पहिलो मात्राको कोरोना भाइरसविरुद्धको खोप लगाइसकेका छन् ।

मन्त्रालयले पहिलो मात्रा खोप लगाएकामा ८० प्रतिशत र दुवैमात्रा खोप लगाएकामा ९० प्रतिशतमा एन्टिबडी पाइएको जनाएको छ ।