हामी सबैकाे संसारन्यूज

२३ भदौ, सिन्धुपाल्चोक । विद्यालयको विविध पक्षमा सुधार ल्याउन साझा प्रतिबद्धतापत्र अनुमोदन गरिएको छ । मेलम्ची नगरपालिकामा भएको ‘कोरोना महामारीमा शिक्षाका सवाल र स्थानीय सरकारको भूमिका’ विषयक छलफल कार्यक्रममा सो पत्र अनुमोदन भएको हो । कार्यक्रम महिला आत्मनिर्भरता केन्द्र, मेलम्ची नगरपालिका शिक्षा शाखाको सहकार्य र शिक्षाका लागि राष्ट्रिय अभियान (एनसिएल)को आयोजनामा सम्पन्न भएको थियो ।

कार्यक्रममा शिक्षालाई कोभिडले पारेको असर, विद्यालयले बेहोर्नु परेको कठिनाइ र चुनौतीका बारेमा छलफल गरी शिक्षाका लागि राष्ट्रिय अभियान (एनसिएल)का जिल्ला संयोजक हर्क तामाङले साझा प्रतिबद्धतापत्र तयार गरेका थिए । सो पत्रमा गुणस्तरीय शिक्षा, शिक्षामा पारदर्शिता हुनुपर्ने, आवश्यक जनशक्तिको व्यवस्था गरिने, शिक्षक र विद्यार्थी दुवैले कडा अनुशासनको पालना गर्नुपर्ने, शिक्षकलाई अभिवृद्धि गरी अभिवृद्धिका लागि तालिमको व्यवस्था गरिने, नमूना विद्यालय बनाउने कुरामा जोड दिने, शिक्षालाई बजेटका आधारमा प्रथम प्राथमिकतामा राख्नुपर्नेलगायत विषय समेटिएको छ । पत्रमा सहभागी सबैले हस्ताक्षर गरी सहमति जनाएका छन् ।

नगरपालिका प्रमुख डम्बर अर्यालले कोरोना महामारीले मात्र नभई नगरक्षेत्रमा विपद्ले पनि शिक्षालाई असर गरिरहेकाले विपद् न्यूनीकरणमा विद्यालय र अभिभावकले ध्यान दिनुपर्ने बताए । उपप्रमुख भगवती नेपालले दिवा खाजालगायत अन्य थप चुनौतीका लागि सम्बन्धित निकायसँग बैठक बसी निर्णय गरिने बताइन् । उनले सबै एकताबद्ध भएर अगाडि बढेमा मात्र नगरको समग्र शिक्षामा सुधार आउने बताइन् ।

कार्यक्रममा प्रमुख प्रशासकीय अधिकृत अमृतकुमार धिताल, शिक्षा शाखा प्रमुख सुदिनराज पोखरेललगायत विद्यालयको प्रअ र केही विद्यालयको व्यवस्थापन समितिका अध्यक्षको सहभागिता थियो ।
रासस