हामी सबैकाे संसारन्यूज

१.
जिउनुको अर्थ आँसुको सागरमा डुब्नु भन्छ
गहिराइमा खेल्दै रहस्यहरूसंग झुक्नु भन्छ
वाहा वाहा ! श्रीपेच तिम्रो खेल गज्जबै रहेछ
खेलौँना बनेरै हाँसोको परिभाषा बुझ्नु भन्छ ।

२.
रुप धेरै छन् नेताका चिल्ला गाडी सरी
मोल मोलाई हुन्छन् राम्रा साडी सरी
छिमेकीमा धाउँदै मस्त राष्ट्रियता गाउन
भत्किरहेछ भेष त्यसैले हुकुमी नाडी सरी ।

३.
नपुंसकताले पौरखको भाषा बोलेको सुन्छु
परिभाषा भन्दै राष्ट्रियतालाई पोलेको सुन्छु
देशको माया भन्दै चलिरहेछ तँछाड मछाड
भरोसाको हैन घातको द्वार खोलेको सुन्छु ।

४.
मूर्ति पनि जीव हुन्छन् मान्छेको मनमा
अजीव ग्रन्थ हुन्छन् मान्छे पैसोको तनमा
पाप धर्म भनी न्याय खोजी हिंडनु बेकार
हो तराजु बिकेका छन् यहाँ महँगा धनमा ।

५.
हो बुझे अङ्ग हुन् परिवार डुङ्गाले जस्तै तारिरहने
जिउँदो बनाई सागरमा नि चट्टान जस्तै भारिरहने
ए धन ! मलाई अङ्गभङ्ग नबनाऊ लालचमा चोपेर
मेरो परिवारै हुन् आत्मा नशाले जस्तै बारिरहने

प्रदीप रत्न शाक्य,बौद्ध, काठमाडौं