Sansar News
काठमाडौं । प्रधानन्यायाधीश चोलेन्द्र शमशेर राणाले सर्वोच्च अदालत परिसरमा माइक र नाराबाजी नगर्न दिएको चेतावनीलाई लत्याउँदै कानून व्यवसायी आज पनि आन्दोलनमा उत्रिएका छन् । कानून व्यवसायीहरुले आन्दोलनलाई थप सशक्त बनाउने चेतावनी पनि दिएका छन् ।
नेपाल बार एसोसिएनका अध्यक्ष चण्डेश्वर श्रेष्ठले प्रदर्शनबाट पछाडि नहट्ने चेतावनी दिए । धर्नामा बोल्दै उनले राणाले राजीनामा नदिँदासम्म कानून व्यवसायी पछाडि नहट्ने स्पष्ट पारे ।
प्रधानन्यायाधीश राणाले सोमबार नेपाल बार एसोसिएसनका अध्यक्ष श्रेष्ठ र सर्वोच्च बारका अध्यक्ष पुर्णंमान शाक्यलाई फोन गरेर अदालत परिसरमा होहल्ला नगर्न चेतावनीपूर्णं भाषाका निर्देशन दिएका थिए । राणाले कानून व्यवसायीको नाराबाजीले सर्वोच्चका सेवा प्रभावित भएको जिकिर गरेका थिए ।
राणाले सर्वोच्च प्रशासनलाई मंगलबारदेखि नै अदालतलाई शान्त बनाउन निर्देशन गरेका थिए । जसको निर्देशनपश्चात सुरक्षाकर्मीहरुले पनि माइकको प्रयोग नगर्न भनेको थियो ।
बार गत कात्तिक ११ देखि निरन्तर आन्दोलनमा छ । बारले राणाले राजीनामा नदिएसम्म आन्दोलन नरोक्ने बताइरहेको छ । तर, राणाले भने निरन्तरको आन्दोलनलाई वेवास्ता गर्दै आएका छन् ।
वि.सं.२०७८ पुस ६ मंगलवार १२:३९ मा प्रकाशित
