हामी सबैकाे संसारन्यूज

काठमाडौं । ग्रीसमा भएको सडक दुर्घटनामा परे मृत्यु हुने नपालीको पहिचान खुलेको छ ।

नोभेम्बर दोस्रो साता गैरकानुनी रुपमा टर्किबाट ग्रिस प्रवेश गर्ने क्रममा ट्रक दुर्घटना परेर ज्यान गुमाएका चार नेपालीको सनाखत भएको हो ।
ज्यान गुमाउनेमा रसुवाकी शर्मिला तामाङ (रमिला घले), भिमेश्वर नगरपालिका–६ दोलखाका राजु लामा, आमाछोदिङमो गाउँपालिका–३ घिरिङ् गाउँपालिका–५ तनहुँका ओम बहादुर थापा र गौरीगंगा नगरपालिका–४ कैलालीका लक्ष्मण सापकोटा रहेको बताइएको छ ।

दुर्घटनामा परेर ज्यान गुमाएका सापकोटाको यसअघि नै सनाखत भएको नेपाली दूतावास भियनाले जनाएको छ ।

नेपाली दूतावास भियनाका अनुसार मृतकका तस्बिरहरु ग्रिस प्रहरीले इन्टरपोलमा राखेको र नेपाल प्रहरीको मानब बेचबिखन अनुसन्धान व्युरोमा पुगेर मृतकका आफन्तले पहिचान गरेपछि सनाखत भएको हो ।

उक्त दुर्घटनामा परि घाईते भएका भीमेश्वर नगरपालिका–९ दोलखाका मनु लामा र गौरीगंगा नगरपालिका–४ कैलालीका लोकराज आचार्यको अवस्था सामान्य रहेको र हाल ग्रीसको ऐथेन्स सहरमा रहेका उनीहरुबाटै गाडीमा अन्य ४ नेपाली पनि रहेको खुलासा भएको दूतावासले जनाएको छ ।

नोभेम्बर दोस्रो साता भएको उक्त दुर्घटनामा परि चार नेपाली सहित सात आप्रवासी नागरिकको मृत्यु भएको थियो भने २ नेपालीसहित ८ घाईते भएका थिए । त्यहाँको प्रहरीका अनुसार ओभरलोड भएका कारण उक्त गाडी दुर्घटना भएको थियो ।