हामी सबैकाे संसारन्यूज

काठमाडौं । धन कमाउन खाडी मुलुकको ओमान पुगेकी एउटी नेपाली चेलीलाइ सिकिस्त अवस्थामा एयरस्ट्रेचरमा राखेर जन्मभूमि फर्काइएको छ ।

ओमानको सललाहमा घरेलु कामदारका रुपमा कार्यरत उनलाई नेपाली दूतावास र एनआरएनए ओमानको सहयोगमा पुष ७ गते (बुधवार) एयर स्ट्रेचरको व्यवस्था गरी नेपाल पठाइएको हो ।

गत मे ८ मा कोरोना संक्रमण भइ सललाहको सुल्तान काबुस अस्पतालमा भर्ना भएकी उनलाई पोस्ट कोभिड–निमोनियामाथि पनि थप संक्रमण तथा अर्ध पारालाइसिस भएर अस्पतालमै गम्भीर अवस्थामा उपचार गराइएको थियो । ७ महिनादेखि उक्त अस्पतालमा उपचारत उनलाई तीन महिनादेखि अस्पतालले थप सुधार नहुने भनेपछि उनको परिवारको सल्लाहमा पारिवारीक पुर्नमिलनका लागि नेपाल पठाइएको दूतावासले जानकारी दिएको छ ।

‘ओमानमा घरेलु कामदारको रूपमा कार्यरत निज महिला २०२१/०५/०८ मा कोभिड–१९ को संक्रमण भई सलालास्थित सुल्तान काबुस अस्पतालमा भर्ना हुनुभएकोमा पोस्ट–कोभिड–निमोनिया भएको र त्यसमा थप संक्रमणहरू भइ अर्ध–प्यारालाइसिस समेत भएर अस्पतालमा थलिनु भएको थियो,’ दूतावासद्धारा जारी विज्ञप्तिमा भनिएको छ, ‘निजलाई खाना समेत नाकबाट पाइपको सहाराले दिइरहेको थियो भने दिसा–पिसाब समेत अतिरिक्त थैलीमा व्यवस्थापन गर्ने गरिएको थियो । वहाँ विगत ७ महिना देखि अस्पतालमा उपचाररत् रहेकोमा गत ३ महिनादेखि अस्पतालले अब थप सुधार हुन समय लाग्ने र यो अवस्थामा नेपाल लान सकिने भन्ने जानकारी गराएको थियो । नेपालमा वहाँको परिवारका छोरी–ज्वाईंसँग सर–सल्लाह गरी नेपाल पठाउने सहमति अनुसार वहाँको यात्रा समन्वय गरिएको थियो ।’

उनलाई सलालाह–मस्टक ओमान एयरको विमान र मस्कटदेखि सलाम एयरको विमानबाट स्ट्रेचरमा नेपाल पठाइएको हो । मृतक महिलाको नाम र ठेगाना भने दूतावासले खुलाएको छैन ।

दूतावासका अनुसार डिसेम्बर १९ का दिन लन्डनबाट नेपाल आउने क्रममा उडानकै क्रममा अकस्मात मृत्यु भएकी एक नेपाली महिलाको शब पनि सोहि विमानमा राखेर नेपाल पठाइएको थियो ।