हामी सबैकाे संसारन्यूज

१
दोबाटोमा छोड्न सक्छ्न् भर नपर्नू
कोमल मुटु फोड्नसक्छन् भर नपर्नू
चोखोमाया बिर्सिनेले टाढा हुँदाखेरि
अन्तै घरबार जोड्नसक्छ्न् भर नपर्नू ।

२
खबरदार तिम्रो हाताभित्र छोप्न नखोज
अँध्यारो कालो छाताभित्र छोप्न नखोज
उडान भर्नुछ अक्षरका पखेटा फिँजाई
रङ्गिबिरङ्गी गाताभित्र छोप्न नखोज ।

३
बाटो फेरेँछु ब्यर्थैमा यात्रा रोकियो नभन्नू
तिमी बिना जिन्दगी अधुरो भैदियो नभन्नू
धर्ती छाडेर तारा रोज्ने तिम्रै रहर त हो नि
मेरो भाग्यमा थिएन र त पोखियो नभन्नू ।

४
घरबेटीले नदेख्ने गरी भित्र छिर्नुपर्छ सरकार
गत वर्षकै उधारो भाडा तिर्नुपर्छ सरकार
यो बेरोजगारीले लाचारै बनायो आजभोलि
यहाँ आफ्नै सपनामा आफैं गिर्नुपर्छ सरकार ।

५
औकात बराबरी मिल्ने खोजेर जानेको
पैतालामा फूल परोस् छाती टेकेर जानेको
फुटपाथ बाटै उठेको मान्छे म फेरि उठूँला
महलमै बास होस् सम्बन्ध बेचेर जानेको ।

जेके तिम्सिना, हल्दिबारी-१ गोलधाप, झापा