हामी सबैकाे संसारन्यूज

नफुल्दै ओइलाएको
टुटफुट र गुटमा मौलाएको
चरम व्यक्तिवाद र अराजकतावाद
उसको आदर्श र जग हो, सामन्तवाद ।

व्यक्तिमा रमाउने
व्यक्तिनै समाउने
व्यक्ति व्यक्ति जुधाउने
व्यक्तिगत फाइदा उठाउने ।

कुरा ठुलो तर काम लुलो
नहर भत्काएर बनाउने कुलो
भान्सा उसको राजसी चुलो
भाषण धर्मकाँटाको तर कपटी तुलो ।

सदा उसको पूजक भए हुन्छ
विचारको बहसमा प्रतिबन्ध छ
उ नै विचारक हो उ मै सबथोक छ
नाम,पद र प्रतिष्ठाको अनन्त भोक छ ।

उ के हो उसैलाई थाहा छैन
फूलको कुनै विशेषता छैन
एउटा फुल हो तर बासना छैन
दुर्गन्धले भरिएको कुनै फूल हुँदैन ।

तर पनि फूल भएकोमा दम्भ छ
फूल वरिपरि काँडाहरु टम्म छ
भविष्य छैन हुस्सु र कुहिरो डम्म छ
तथापि भक्तहरुको भक्तिगान अचम्म छ।

कुहिएको अनि भक्ति आशक्त फूल
काँडाले घेरिएको अति विषाक्त फूल
जनघात,राष्ट्रघातहरुमा अभिव्यक्त फूल
सदाका लागि जनमनबाट परित्यक्त फूल।

एउटा कथित अनि पतित फूल ।।

चेतन गिरी
ठेगाना: सारदा नगरपालिका-९, सल्यान