हामी सबैकाे संसारन्यूज

मङ्गलबारे । नेपाली कांग्रेस इलामले किरात धर्मगुरु आत्मानन्द लिङ्देन र धर्मगुरुपत्नी साँवा पवित्रहाङमा लिङ्देनलाई अभिनन्दन गरेको छ ।
मङ्गलबार नेपाली कांग्रेसका सभापति डम्बर खड्का नेतृत्वको टोलीले धर्मगुरुकै निवास इलामको माङसेबुङ गाउँपालिका-५ स्थित लारुम्बामा गएर उनीहरुलाई अभिनन्दन गरको हो ।

धर्मगुरुको ६८औँ नुमाङगेन्ना तथा धर्मगुरुपत्नीको ६६औँ जन्मोत्सवका अवसरमा कांग्रेसले अभिनन्दन गरेको सभापति खड्काले बताए । ‘नेपाली कांग्रेस’ लेखिएको ‘सुन र चाँदी’ द्वारा निर्मित ब्याच धर्मगुरु र धर्मुगुरुपत्नीलाई लगाइदिएर सम्मान गरिएको उनले बताए । विश्व शान्ति, मानव एकता, मानवप्राणी एवम् सृष्टिजगत्कै रक्षाका लागि महान् अभियान सञ्चालन गरी मानवमा उच्च चेतना जगाई समाज रूपान्तरणको कार्यमा किरात धर्म, संस्कृति, भाषा, लिपि र साहित्यको प्रचारप्रसारमा पुर्याएको योगदानको कदर गर्दै अभिनन्दन गरिएको सभापति खड्काले बताए ।

उनले माङसेबुङ क्षेत्रलाई धार्मिक पर्यटकीय क्षेत्रका रुपमा विकास गर्नका लागि आफ्नो र पार्टीका तर्फबाट सक्दो सहयोग गर्ने प्रतिबद्धता व्यक्त गरे । माङसेबुङ गाउँपालिका-२ इभाङको चुक्चिनाम्बा अगौटेबारीमा १८ मङ्सिर २०११ जन्मिएका धर्मगुरु लिङ्देनले राष्ट्रिय विभूति महागुरु फाल्गुनन्द लिङ्देनको अधुरो कार्यलाई पूर्णता दिने भन्दै धार्मिक, सांस्कृतिक तथा सामाजिक रुपान्तरणका लागि अभियान चलाइ रहेका छन् । उनलाई सत्य, शान्ति र अहिंसाका उपासकका रुपमा किरात धर्मावलम्बीहरुले मान्ने गरेका छन् ।
रासस/फाइल फोटो