हामी सबैकाे संसारन्यूज

काठमाडौं । नेकपा (माओवादी केन्द्र) का नेता नारायणकाजी श्रेष्ठले रसियाले युक्रेनको राष्ट्रिय सार्वभौमिकता, भौगोलिक अखण्डता र आत्मनिर्णयको सम्मान गर्दै आक्रमण अन्त्य गर्नुपर्ने माग गरेका छन् ।

युक्रेनमाथि रुसले गरेको आक्रमण र अतिक्रमणको भत्र्सना गर्दै नेता श्रेष्ठले रुसले तत्काल युक्रेनमाथिको आक्रमण अन्त्यगरी त्यहाँबाट फिर्ता हुन समेत माग गरेका छन् ।

सार्वभौमिक समानता र बिश्व शान्तिको पक्षमा उभिन सबैसँग अपील गर्दै नेता श्रेष्ठले भनेका छन्–‘युक्रेन घटनाबाट शिक्षाः कुनै पनि शक्ति राष्ट्रले आफ्नो रणनीतिक स्वार्थका लागि अर्को राष्ट्रलाई प्रयोग गर्न खोज्दा र त्यसलाई स्विकार गर्दा साना राष्ट्रको अस्तित्व नै गुम्ने खतरा उत्पन्न हुन सक्ने रहेछ ।’

नेता श्रेष्ठले यस प्रकरणमा आमेरिकाले युक्रेनको छिमेकी रुसकाबिरुद्ध युक्रेनलाई प्रयोग गर्न खोजेको र त्यो भूमिकाका निम्ति युक्रेन तयार हुँदा आजको यो आक्रमण, युद्ध र अस्तित्व बिसर्जनको दुःखद घटना उत्पन्न भएको ठहर गरेका छन् ।

‘नेपालले आफ्नो भूराजनीतिक संवेदनशीलतालाई ध्यान दिदै यस घटनाबाट समेत शिक्षा लिन सक्नु पर्दछ ।’ सामाजिक संजालकमा नेता श्रेष्ठले लेखेका छन् ।