हामी सबैकाे संसारन्यूज

काठमाडौं । नेकपा (माओवादी) केन्द्रका अध्यक्ष पुष्पकमल दाहाल ‘प्रचण्ड’ नेता नाराणकाजी श्रेष्ठलाई भेट्न श्रेष्ठ निवास हात्तिवन पुगेका छन् ।

अमेरिकन सहयोग परियोजना एमसीसी सम्झौताभित्र रहेका केही बुँदाहरुलाई संशोधन नगरी सदनबाट पास गर्न नहुने अडान राख्दै आएका श्रेष्ठ, अध्यक्ष प्रचण्ड र एकिकृत समाजवादीका अध्यक्ष माधव कुमार नेपालको सहमतिमा ‘व्याख्यात्मक टिप्पणी’ सहित एमसीसी अनुमोदन गरिएपछि आक्रोशित बनेका थिए ।

सोमबारको पत्रकार सम्मेलनमा समेत अध्यक्ष प्रचण्डले नेता श्रेष्ठलाई चित्त नबुझे पार्टी छोडेर जान सकिने आशयको अभिव्यक्ति दिएपछि श्रेष्ठ पक्षका केही नेताले उनलाई पार्टी त्यागेर नयाँ पार्टी बनाउन दवाव दिइरहेका बेला अध्यक्ष प्रचण्ड श्रेष्ठ निवास पुगेका हुन् ।

यसअघि विभिन्न राजनीतिक घटनामा अध्यक्ष प्रचण्डबाट भएका कमजोरीलाई ढाकछोप गर्दै समग्र पार्टीको रुपान्तरण हुनुपर्छ भन्दै आएका श्रेष्ठमाथि अध्यक्ष प्रचण्डले सोमबार त्यस्तो अभिव्यक्ति दिएपछि उनी रुष्ट भएको स्रोतले जनाएको छ ।