हामी सबैकाे संसारन्यूज

काठमाडौं । नेपाली कांग्रेसभित्र आगामी स्थानीय तहको चुनावमा गठबन्धन गरेर जानुपर्ने मत बलियो गरि देखिएको छ । शनिबारदेखि बसेको केन्द्रीय समिति बैठकमा बोल्ने अधिकांश नेताहरुले आगामी स्थानीय तहको चुनावमा गठबन्धन गरेर मत राखेका हुन् ।

नेताहरुले गठबन्धन गर्नुपर्ने तर, त्यसको मापदण्ड र अधिकारका स्पष्ट बनाउनुपर्ने सुझाब राखेका छन् । नेताहरुले अन्य दलका नेतालाई जिताउन नभइ संविधान मिच्ने शक्ति नेपा (एमाले) हराउन पनि गठबन्धन गर्नुपर्ने सुझाब दिएका छन् ।

बैठककै बीचमै बाहिरिएका नेता रामचन्द्र पौडेलले गठबन्धन बनाउनु पर्ने तर, गठबन्धनको नीति र मापदण्ड स्पष्ट पार्नु पर्ने धारणा नेताहरुको रहेको बताए । “अहिले सुझावहरु गठबन्धन गर्नुपर्छ भन्ने नै धेरै छन्, पार्टीले गठबन्धन गरेरै जान्छ भन्ने धेरैको बुझाइ छ, बैठकको परिदृष्य त्यस्तै देखिन्छ”, पौडेलले भने, “तर, नीति र मापदण्डमा भने छलफल हुनुपर्ने धारणा छ।”

गठबन्धन बनाउन केन्द्र नभई स्थानीय नेतृत्वलाई नै जिम्मा दिनुपर्ने सुझाब नेताहरुले राखेका छन् । केन्द्रबाट हस्तक्षेप गर्दा गठबन्धन नबन्ने र बनिहाले पनि अर्थपूर्णं हुन नसक्ने नेताहरुको बुझाई छ ।

कांग्रेसभित्र आगामी स्थानीय तहको चुनावलाई लिएर गठबन्धन गर्ने वा एक्लै लड्ने भन्ने विषयमा बहस छ । प्रधानमन्त्रीसमेत रहेका पार्टी सभापति शेरबहादुर देउवा गठबन्धनसहित चुनाव लड्ने मनस्थितिमा छन् भने संस्थापन इतर समूहका नेता शेखर कोइराला एक्लै चुनाव लड्नुपर्ने अडानमा देखिन्छन् ।

विशेष गरी माओवादी केन्द्रले एमालेसँग चुनावी तालमेल गर्दा कांग्रेसलाई देशैभर क्षति हुने त्रास कांग्रेसमा देखिएको छ । सोही चुनावी अंकगणितको लेखाजोखा गरि देउवा पक्ष गठबन्धन गर्नुपर्ने पक्षमा उभित्रएको बुझिन्छ ।