हामी सबैकाे संसारन्यूज

काठमाडौं । नेपाल आयल निगमले इन्धनको खपत घटाउन तत्कालै निजी र सरकारी सवारी साधनहरुमा जोर बिजोर लगाउन प्रस्ताव गरेको छ । पेट्रोलियम पदार्थमा लगातार अधिक घाटा भएपछि निगमले इन्धन खपत घटाउन यस्तो प्रस्ताव गरेको हो ।

निगमले आइतबार उद्योग वाणिज्य तथा आपूर्ति मन्त्रालयलाई पत्र पठाउँदै इन्धनको खपत घटाउन १० बुँदे प्रस्ताव गरेको छ । निगमले इन्धनको खपत घटाउन आइतबार पनि सार्वजनिक बिदा दिन भनेको छ ।

शनिबार र आइतबार दुई दिन सार्वजनिक बिदा दिँदा इन्धन खपत कमी आउने निगमको विश्वास छ । निगमले पेट्रोल र डिजलबाट चल्ने सवारी साधनको आयातलाई निरुत्साहित गरी विद्युतीय सवारी साधन आयातलाई प्रोत्साहन गर्न पनि माग भनेको छ ।

निगमले ठूला उद्योग, परियोजना, होटल आदिलाई डिजल तथा एलपी ग्याँसको खपत नगरी विद्युतको खपत बढाउन आव्हान गर्न पनि भनेको छ । पेट्रोल र डिजलबाट चल्ने सवारी साधनको आयातलाई निरुत्साहित गर्न विद्युतीय सवारी साधनमा प्रोत्साहन गर्न, खाना पकाउने एलपी ग्यासको प्रयोग नगरी विद्युतीय चुलो प्रयोग गर्न सरकारबाटै सार्वजनिक आह्वानको प्रस्ताव निगमले गरेको छ ।

रुस–यूक्रेनबीच जारी युद्धका कारण अन्तराष्ट्रिय बजारमै कच्चा तेलको मूल्य अत्याधिक बढेको छ । जसले गर्दा नेपालमा पनि व्यापार घाटा चुलिँदो छ । आयल निगम इन्धनको मूल्य बढेसँगै निरन्तर घाटामा छ ।