हामी सबैकाे संसारन्यूज

काठमाडौं । राष्ट्रिय प्रजातन्त्र पार्टीसँग एकता प्रयासमा जुेटका विवेकशील साझाका अध्यक्ष रवीन्द्र मिश्र अन्ततः आफ्नै पार्टीभित्र अल्पमतमा परेका छन् । उनीविरुद्व बहुमत केन्द्रीय सदस्य उजुरी बोकेर निर्वाचन आयोग पुगेका छन् । विवेकशील साझाका १६३ केन्द्रीय सदस्यमध्ये ९६ जनाले उनीविरुद्व सोमबार आयोगमा उजुरी दिएका हुन् ।

१६३ सदस्यीय पार्टीमा बहुमत पुर्‍याउन ८२ केन्द्रीय सदस्यको आवश्यकता पर्दछ । तर, निर्वाचन आयोगमा बहमुतभन्दा बढी सदस्यले उजुरी बुझाएका हुन् । जसबाट स्पष्ट रुपमै मिश्र अल्पमतमा परेको देखिएको छ । आयोगमा उनीविरुद्व ९६ जना उभिएसँगै उनको पक्षमा मात्रै ६७ जना सदस्य देखिएका छन् ।

आइतबार बसेको विवेकशील साझा पार्टीको केन्द्रीय कमिटी बैठकमा केन्द्रीय सदस्यहरुले अध्यक्ष मिश्रलाई राप्रपासँगको एकताबारे स्पष्ट पार्न भनेका थिए । तर, एजेण्डा नै नभएको विषयमा छलफल नगर्ने भनेपछि बैठक भाँडिएको थियो । बैठकमा चर्काचर्की भएसँगै मिश्रले बैठक आकस्मिक रुपमा अन्त्य गरिदिएका थिए ।

मिश्रको निर्णयप्रति आपत्ति जनाएका नेताहरुले मिश्रलाई नै स्पष्टीकरण सोध्ने निर्णय गरेका थिए । जेष्ठ सदस्य भीमप्रसाद अधिकारीको अध्यक्षतामा बसेको असन्तुष्ट समूहको बैठकले मिश्रलाई अध्यक्ष पदबाट निष्कासन किन नगर्ने ? भनि तीन दिने स्पष्टीकरण सोध्ने निर्णय गरेको थियो ।

असन्तुष्ट पक्षले स्पष्टीकरण टुंगो नलगाउँदासम्म बैठक आव्हान गर्न रोक्ने निर्णय गरेको थियो । असन्तुष्ट समूहको निर्णय र मिश्रलाई कारबाहीको माग राख्दै संगठन विभाग प्रमुख निर्देश सिलवाललगायतले निर्वाचन आयोगमा उजुरी दिएका हुन् ।