हामी सबैकाे संसारन्यूज

रियाद । साउदी अरब र संयुक्त अरब इमिरेट्स (यूएई) ले द्वन्द्वग्रस्त यमनलाई तीन अर्ब ५० करोड अमेरिकी डलरको सहयोग गर्ने बिहीबार घोषणा गरेका छन् ।

यमनी राष्ट्रपतिको नेतृत्वमा रहेको परिषद्को गठनपछि यमनका लागि सहयोगको घोषणा गरिएको हो ।

साउदी अरब र यूएईद्वारा संयुक्त रूपमा प्रस्तावित दुई अर्ब डलर र संयुक्त अरब इमिरेट्स यमनको केन्द्रीय बैंकमार्फत यमनमा आधारभूत सहयोगका लागि दिइने भएको साउदी अरबको राज्य सञ्चालित समाचार संस्थाले बताएको हो ।

यो सहयोग पेट्रोलियम पदार्थजन्य सामान खरिद, विकास परियोजना तथा पहललाई सहयोग गरिनेछ । साउदी अरबले पनि सन् २०२२ मा संयुक्त राष्ट्रसङ्घको (संयुक्त राष्ट्रसङ्घ) मानवीय सहयोग कार्यक्रमका लागि तीन करोड डलर दिने घोषणा यस पहिले पनि गरिसकेको छ ।

यसैबीच, साउदी अरबले भर्खरै स्थापना भएको यमनी परिषद्लाई संयुक्त राष्ट्रसङ्घको तत्वावधानमा हुथीहरूसँग अन्तिम र व्यापक राजनीतिक समाधानमा पुग्न वार्ता सुरु गर्न आग्रह गरेको छ ।

यसपहिले यमनी राष्ट्रपति अब्द–रब्बु मनसुर हाडीले उनकै नेतृत्वमा यमनी परिषद्को स्थापना गर्ने घोषणा गरी आफ्नो शक्ति परिषद्लाई हस्तान्तरण गरिएको बताएका छन् ।

राष्ट्रपतिको यो कदम संयुक्त राष्ट्रसङ्घको पहलमा यमनमा जारी द्वन्द्वका लागि भएको वार्तापछि युद्धविरामको घोषणा भएपछि आएको हो ।

परिषद्ले सङ्क्रमणकालमा देशको नेतृत्वको जिम्मेवारी लिई शान्ति प्रक्रियालाई अघि बढाउने छ ।

सन् २०१४ को अन्त्यदेखि गृहयुद्धमा फसेको यमनमा इरान निकट मानिने हुथी विद्रोहीका लडाकूले विभिन्न उत्तरी प्रान्तहरूको नियन्त्रण गरी राष्ट्रसङ्घ, साउदी अरबलगायत अन्य बहुसङ्ख्यक अरब मुलुकको समर्थन रहेको संयुक्त सरकारलाई राजधानी साना छोड्न बाध्य पारेको थियो । त्यसपछि साउदी नेतृत्वको अरब गठबन्धनले मार्च २६, २०१५ देखि यमनी सरकारलाई सहयोग गर्न हुथी विद्रोहीविरूद्ध हस्तक्षेप गरेको थियो । सिन्ह्वा