काठमाडौं । माओवादी केन्द्रभित्रको आन्तरिक विवादबारे अर्थमन्त्रीसमेत रहेका जनार्दन शर्माले मुख खोलेका छन् । पूर्वअर्थमन्त्रीसमेत रहेका नेता वर्षमान पुनले आफुले चालेको कदमका विरुद्व बोल्दै हिँड्न थालेपछि शर्माले आन्तरिक विवादबारे प्रष्ट्याएका हुन् ।
उनले वर्षमान पुन एमालेसँग सहकार्य गर्न चाहिरहेको पनि बताएका छन् । एमालेसँग सहकार्य गर्ने चाहना पुरा नहुँदा पुनले आफ्ना कदमको विरोध गरेको उनको भनाई छ ।
“वर्षमान पुन र म साथी साथी हौं, सहयोद्धा हौं । उहाँसँग मेरो सम्बन्ध राम्रै छ, तर उहाँ एमालेसँग तालमेलमा जान चाहनुहुन्छ । हामी गठबन्धनलाई बलियो बनाउने पक्षमा छौं”, शर्माले एक टेलिभिजन भनेका छन् , “गठबन्धन बलियो बनाउने कुरा उहाँलाई मन पपरेको छैन, उहाँले गभर्नर निलम्बनलगायतको विरोध त्यहि पेरिफेरिमा गर्नुभएको हो ।”
पछिल्ला विरोधले वर्षमानलाई कुनै राजनीतिक लाभ नमिल्ने पनि शर्माले ठोकुवा गरे । “उहाँको बुझाइको समस्या हो । उहाँले आफूलाई राजनीतिक फाइदा हुन्छ भनेर निलम्बनको आलोचना गर्नुभएको होला । तर, उहाँलाई केही फाइदा हुन्न ।”
शर्माले पार्टी महासचिवको विषयमा देखिएको विवाद कार्यकर्ताको चाहनाअनुसार टुंग्याउने बताएका छन् । उनले महासचिव को बन्ने भन्ने कुरा रहर गरेर मात्रै नहुने बताएका छन् ।
वि.सं.२०७८ चैत २९ मंगलवार १३:१९ मा प्रकाशित