हामी सबैकाे संसारन्यूज

काठमाडौं । पोखरा महानगरको प्रमुख पदमा माधव कुमार नेपाल नेतृत्वको नेकपा (एकिकृत समाजवादी) पार्टीले दावी गरेपछि नेपाली कांग्रेसले मित्रवत् प्रतिश्पर्धामा जाने बताएको छ ।

पोखरा कांग्रेसले प्रमुख पदमा एकिकृत समाजवादी पार्टीले अस्वभाविक दावी गरेका कारण सहमति हुन नसकेको भन्दै सो पार्टीसँग स्थानीय निर्वाचनमा मैत्रीपूर्ण र स्वच्छ प्रतिश्पर्धा सहित जाने निर्णय गरेको विज्ञप्तिमार्फत् जनाएको छ ।

‘जिल्ला संयन्त्रबाट निर्वाचनका लागि तालमेल गर्ने सम्बन्धमा नेकपा (एकिकृत समाजवादी) सँग कास्की जिल्लामा व्यापक छलफल हुँदा पनि नेकपा एकिकृत समाजवादीको अस्वभाविक दावीका कारणले निष्कर्ष निस्कन नसकेको र पार्टी मातहतका निकायहरुको राय सुझवलाई समेत मध्यनजर गरी अनय गठबन्धनका दलहरुसँग तालमेलका लागि वार्ता संवाद अगाडि बढाउने र नेकपा एकिकृत समाजवादीसँग स्थानीय निर्वाचनमा मैत्रीपूर्ण र स्वच्छ प्रतिश्पर्धा सहित जाने निर्णय गरियो ।’ नेपाली कांग्रेसका कास्कीका सचिव देवेन्द्र रानाभाट र भानुभक्त ढकालले जारी गरेको विज्ञप्तिमा भनिएको छ ।

उता नेकपा एकिकृत समाजवादीका जिल्ला अध्यक्ष धनराज आचार्यले भने भित्र गठबन्धनको बैठक बसिरहेका बेला बाहिर कांग्रेसले एकलौटी रुपमा विज्ञप्ति जारी गरेको भन्दै असन्तुष्ट व्यक्त गरेका छन् ।

आचार्यले लेखेका छन्– ‘कास्कीमा सत्ता गठवन्धनमा रहेका दलहरु विच स्थानीय तहको निर्वाचन केन्द्रित बैठक भर्खर प्रारम्भ भएको छ । गठबन्धनका सम्वन्धमा विभिन्न माध्यमवाट आईरहेका भ्रामक समाचारहरुलाई खारेज गर्दै, थप एकतावद्ध भएर अगाडि बढ्ने अठोटका साथ बैठक अगाडि बढेको छ । नेपाली काँग्रेशका सभापति किशोरदत्त वरालको अध्यक्षतामा जारी बैठकमा माओवादी केन्द्र, एकीकृत समाजवादी, जसपा र राजमोका नेताहरुको सहभागिता रहेको छ । आजैको बैठकवाट सकरात्मक समाचार सम्प्रेषण हुने अपेक्षा गरिएको छ ।’