हामी सबैकाे संसारन्यूज

काठमाडौं । होटल संघ नेपाल र होटल सम्बद्ध केन्द्रीय ट्रेड युनियनबीच तलब भत्ता तथा सेवा सुविधाका विषयमा ५ बुँदे सम्झौता भएको छ । होटल संघकी अध्यक्ष सृजना राणाको अध्यक्षतामा सोमबार उक्त सम्झौता भएको हो ।

कोरोना महामारीपछि सञ्चालनमा आएका होटलका लागि २०७६ चैत ११ गते भन्दा अघि श्रमिक तथा कर्मचारीहरुले प्राप्त गर्दै आएको तलब सुविधा तथा सामूहिक सम्झौताबाट प्राप्त गरिएका सुविधा उपलब्ध गराउने र सरकारले बढाएको पारिश्रमिक लागु गर्ने सम्झौता भएको हो ।

सम्झौतामा सञ्चालनमा नआएका होटल, बन्द तथा पुननिर्माणमा रहेका र आंशिक रुपमा सञ्चालनमा आएका होटलहरुको हकमा स्थानीय आधिकारिक युनियन वा क्रियाशिल ट्रेड युनियन वा व्यवस्थापन बीचमा हुने सम्झौता बमोजिम हुने उल्लेख छ ।

यसैगरी विगतमा भएका सम्झौताहरुको हकमा कुनै पनि विवाद नगर्ने र समस्या आएमा आपसी सहमतिमा टुंग्याउने सम्झौता भएको छ । सम्झौतामा बन्दाबन्दीको अवस्थामा भएका सम्झौताहरु कार्यान्वयन नभएका होटल र प्रतिष्ठानहरुले कार्यान्वयन गर्ने र सेवा शुल्क प्रतिष्ठानहरुले काममा बोलाएका वा नबोलाएका श्रमिकहरुलाई दामासायी रुपमा सबैलाई वितरण गर्नु पर्ने उल्लेख छ ।

हान र नेपाल स्वतन्त्र होटल, क्यासिनो तथा रेष्टुराँ मजदुर युनियन, अखिल नेपाल होटल, क्यासिनो तथा रेष्टुराँ मजदुर संघ र नेपाल पर्यटन तथा होटल सम्बद्ध श्रमिक संघबीच सम्झौता भएको हो ।