हामी सबैकाे संसारन्यूज

काठमाडौं । पाँच दलीय सत्ता गठबन्धनको नेतृत्वकर्ता नेपाली कांग्रेसले रोल्पामा भने एमालेसँग चुनावी तालमेल गरेको छ । कांग्रेसले रोल्पाको माडी गाउँपालिकामा एमालेसँग तालमेल गर्दै उम्मेदवारी दिएको छ ।

माडी गाउँपालिकामा सोमबार दुवै दल मिलेर उम्मेदवारी दिएका हुन् । रोल्पामा दुई दलको तर्फबाट अध्यक्षमा विजय घर्तीमगर र उपाध्यक्षमा कृष्ण विकको उम्मेदवारी दर्ता भएको छ । मगर एमालेका हुन् भने विक कांग्रेसका उम्मेदवार हुन् ।

दुई दलले पालिकाका सबै वडामा पनि सहकार्य गरेका छन् । जसअनुसार ६ वटा वडा रहेको पालिकामा कांग्रेसले ३ र एमालेले तीन वडाको नेतृत्व पाएको छ ।

सुनछहरीमा कांग्रेस, एमाले र विप्लवबीच सहकार्य

यता रोल्पाको सुनछहरी गाउँपालिकामा नेपाली कांग्रेस, नेकपा (एमाले) र नेत्रविक्रम चन्द नेतृत्वको (नेकपा)बीच चुनावी गठबन्धन भएको छ । सुनछहरीमा विप्लवको तर्फबाट अध्यक्षको उम्मेदवार बनेका अमर झाँक्रीलाई दुई दलले सघाउने निर्णय गरेका छन् । पालिकाको उपाध्यक्षमा भने कांग्रेसले सहमतिमै उम्मेदवारी दिएको छ ।

स्वतन्त्र उम्मेदवारी दिएका भएपनि विप्लवका झाँक्री एमालेको चुनाव चिन्हबाट लड्नेछन् । ७ वडा रहेको सुनछहरीमा कांग्रेसलाई ३, एमालेलाई तीन र विप्लवलाई १ वडा दिने सहमति भएको छ ।