Sansar News
काठमाडौं । यहि बैशाख ३० गते हुने स्थानीयतहको निर्वाचनका लागि उम्मेदवारी दिएका मध्ये ३५३ जना निर्विरोध निर्वाचित भएका छन् ।
देशका विभिन्न जिल्लाका निर्वाचन कार्यालयमा मनोनयन दर्ता गराएका उम्मेदवार मध्ये ३५३ जना निर्विरोध निर्वाचित भएका हुन् ।
निर्वाचन आयोगको प्रणालीमा प्रविष्ट भएअनुसार विभिन्न पदमा एकल उम्मेदवारी परेका ३५३ निर्विरोध निर्वाचित भएका हुन् ।
निर्विरोध निर्वाचित भएकामा नेकपा एमालेबाट एक अध्यक्ष, २ उपाध्यक्ष, १४ वडा अध्यक्ष, २६ वडा सदस्य, २३ महिला सदस्य र ५७ दलित महिला सदस्यसहित १२३ पद निर्विरोध जितेको छ ।
त्यस्तै गठबन्धनमा रहेका दलहरुमा नेपाली कांग्रेसले एक उपाध्यक्ष, १४ वडाअध्यक्ष, ३१ वडा सदस्य, १५ महिला सदस्य र ४० दलित महिला सदस्यसहित १०१ पदमा निर्विरोध जित हासिल गरेको छ ।
नेकपा माओवादी केन्द्रबाट उम्मेदवारी दिएका तीन वडाअध्यक्ष, पाँच वडा सदस्य, ७ महिला सदस्य र ३९ दलित महिला सदस्यसहित ५४ पदमा जित हासिल गरेको छ ।
नेकपा एकीकृत समाजवादीले दुई गाउँपालिका अध्यक्ष, एक उपाध्यक्ष, ६ वडाअध्यक्ष, १२ वडा सदस्य, ७ महिला सदस्य र ६ दलित महिला सदस्य गरी ३४ जना निर्विरोध निर्वाचित भएका छन् ।
त्यस्तै राप्रपाबाट २ वडा सदस्य,जनता समाजवादी पार्टीबाट एक दलित महिला सदस्य र स्वतन्त्रबाट ६ वडाध्यक्ष र १६ वडा सदस्य, ८ महिला सदस्य र ४ जना दलित महिला सदस्य निर्विरोध निर्वाचित भएका छन् ।
त्यस्तै लोकतान्त्रिक समाजवादी पार्टीबाट एक दलित महिला सदस्य, राष्ट्रिय जनमुक्ति पार्टीबाट एक महिला वडा सदस्य र नेपाल मजदुर किसान पार्टीबाट दुई दलित महिला सदस्य गरी हालसम्म ३५३ जना निर्विरोध निर्वाचित भएका हुन् ।
०७४ को निर्वाचनमा ४१२ जना निर्विरोध निर्वाचित भएका थिए ।
स्थानीयतहको निर्वाचनका लागि देशैभरीबाट १ लाख ५३ हजार १४५ जनाले विभिन्न पदमा उम्मेदवारी दिइएकोमा हालसम्म ८ हजार ३३ जनाले उम्मेदवारी फिर्ता लिएका छन् ।
वि.सं.२०७९ वैशाख २० मंगलवार १५:४१ मा प्रकाशित
