Sansar News
काठमाडौं । काभ्रेको रोशी गाउँपालिकामा तीर्थ यात्रु सवार बस र जीप ठोक्किदा ५ जनाको मृत्यु भएको छ ।
बीपी राजमार्ग अन्तर्गत काभ्रेको रोशी गाउँपालिका ११ मा भएको उक्त दुर्घटनामा एक बालकसहित ५ जनाको मृत्यु भएको र १८ जना घाईते भएको प्रहरीले जनाएको छ ।
काभ्रेका एसपी चक्रराज जोशीका अनुसार सिन्धुलीबाट काठमाडौंतर्फ आइरहेको ना १ ज ४२१० नम्बरको जीप र काठमाडौंबाट भारततिर तिर्थयात्री बोकेर गइरहेको यूपी ५८३८१८१ नम्बरको बस ठोक्किदा पाँचजनाको मृत्यु भएको हो ।
दुर्घटनामा परेर मृत्यु हुनेमा जिपमा सवार सिन्धुलीको कमलामाई–७ का ३१ वर्षीय बिक्रम श्रेष्ठ, कमलामाई–४ का ४५ वर्षीय हरिबहादुर बल रामेछापकी ३५ वर्षीया सम्झना भुसाल, उनको ७ वर्षीय छोरा संगित भुसाल र सुनकोशी–१ की ४४ वर्षीया प्रमिला नेपाली रहेको जोशीले जानकारी दिएका छन् ।
त्यस्तै जीपमा सवार ८ र बसमा सवार १० गरी १८ जना घाईतेका धुलिखेल अस्पतालमा उपचार भइरहेको पनि प्रहरीले जनाएको छ ।
वि.सं.२०७९ वैशाख २१ बुधवार १५:२४ मा प्रकाशित
