हामी सबैकाे संसारन्यूज

काठमाडौं । प्रधानमन्त्री एवम् नेपाली कांग्रेसका सभापति शेरबहादुर देउवाले भरतपुर महानगरपालिकाको मेयरको उम्मेदवार बनेकी रेनु दाहाललाई जिताउन पार्टी पंक्तिलाई आग्रह गरेका छन्। बिहीबार भरतपुरमा आयोजित गठबन्धनको संयुक्त चुनावी सभालाई सम्बोधन गर्दै देउवाले दाहालको कार्यकालमा भरतपुरका हरेक गल्ली पिच भएको बताए ।

“यस्तो काम गर्ने मान्छे मेयर नभएर को हुन्छ त ?”, देउवाले भने, “यस्तो काम गर्ने मान्छेलाई हरायो भने भरतपुरका जनताले के भन्लान् ?”

रेनुजी बेरुजु नभएको नगरपालिकाको मेयर भएको देउवाको भनाइ छ। “ठाउँ–ठाउँमा पिच भएको छ, कालोपत्रे भएको छ। यहाँको भाउ बढिसक्यो, सबैलाई थाहा छ नि”, देउवाले भनेका छन्, “स्मार्ट सिटीको कुरा उठाउनु भएको छ, अन्तर्राष्ट्रिय क्रिकेट मैदान बनाउने भन्नु भएको छ, यो सानो कुरा हो ? इन्टरनेसनल कन्फरेन्स हल बनाउने कुरा गर्नु भएको छ, यो सानो कुरा हो ?”

कुनै पनि पार्टीले पनि बहुमत ल्याउन नसक्ने भएकाले मुलुकमा गठबन्धन आवश्यक रहेको देउवाको भनाइ थियो । उनले गठबन्धन तोड्ने सबै खालका षडयन्त्रलाई परास्त पारिने बताए ।