हामी सबैकाे संसारन्यूज

काठमाडौं । भारतका प्रधानमन्त्री नरेन्द्र मोदीको लुम्बीनी भ्रमणको तालिका सार्वजनिक गरिएको छ । बिहिबार परराष्ट्र मन्त्रालयल विज्ञप्ति जारी गर्दै प्रधानमन्त्री शेरबहादुर देउवाको निमन्त्रणामा भारतीय प्रधानमन्त्री लुम्बिनी भ्रमणका लागि आउन लागेको जनाएको हो ।

बुद्धजयन्तीका अवसरमा लुम्बिनीमा हुने विशेष समारोहमा प्रधानमन्त्री देउवासँगै भारतीय प्रधानमन्त्री मोदी सहभागी हुने मन्त्रालयले जनाएको छ । प्रधानमन्त्री देउवासँगै भारतका प्रधानमन्त्री मोदीले मायादेवी मन्दिरमा पूजाअर्चना गर्ने, लुम्बिनीको विहार क्षेत्रमा बौद्ध संस्कृति तथा सम्पदा केन्द्रको शिलान्यास गर्ने र विशेष समारोहलाई सम्बोधन गर्ने कार्यक्रम रहेको मन्त्रालयले जनाएको छ । मन्त्रालयका अनुसार लुम्बिनी अन्तर्राष्ट्रिय बौद्ध ध्यान केन्द्र र सभा हलमा बुद्ध जयन्ती मनाउने तयारी गरिएको छ ।

लुम्बिनीमा रहँदा दुवै प्रधानमन्त्रीले नेपाल–भारत सहयोग र आपसी हितका विषयमा द्विपक्षीय वार्ता गर्ने मन्त्रायलयले जनाएको छ । मन्त्रालयका अनुसार प्रधानमन्त्री देउवाले भारतीय प्रधानमन्त्री र भ्रमणमा रहेका प्रतिनिधिमण्डलको सम्मानमा दिवाभोजको आयोजना गर्नेछन् । परराष्ट्रमन्त्री डा नारायण खड्काले भारतका प्रधानमन्त्री मोदीसँग भेट गर्ने कार्यक्रम रहेको मन्त्रालयले जनाएको छ ।

भारतीय प्रधानमन्त्रीका रूपमा नरेन्द्र मोदीको यो पाँचौं नेपाल भ्रमण हुनेछ भने लुम्बिनी भ्रमण पहिलो हुने छ ।