Sansar News
काठमाडौं । तारा एयरले आइतबारदेखि सम्पर्कविहीन भएको ९ एनएईटी ट्विनअटर विमान मुस्ताङको थासाङ गाउँपालिका वडा नं २ को सानुसरे भिरमा दुर्घटनाग्रस्त अवस्थामा फेला परेको पुष्टि गरेको छ ।
कम्पनीले १४ हजार ५०० फिटको उचाईमा दुर्घटनाग्रस्त रुपमा जहाज फेला परेको जानकारी गराउँदा स्तब्ध भएको विज्ञप्ति मार्फत् जनाएको छ । आइतबार बिहान १०ः५५ बजे पोखराबाट मुस्ताङका लागि उडेको जहाज मुस्ताङको आकासमा पुगेपछि सम्पर्क बिहीन भएको थियो ।
‘वायुयान अन्तिमपटक जोमसोम टावरसँग १०ः७ बजे घोडेपानीबाट सम्पर्कमा आएपश्चात सम्पर्क विहीन भएको थियो’, विज्ञप्तिमा भनिएको छ, ‘प्रतिकुल मौसम तथा जटिल भूगोलका बाबजुद पनि नेपाल नागरिक उड्डयन प्रािधकरण, खोज तथा उद्धार समन्वय केन्द्रमार्फत् आज बिहानैदेखि हवाई तथा स्थलमार्गबाट खोजी गर्दा उक्त दुर्घटनास्थल फेला परेको र हाल उद्धारकर्मीहरु घटनास्थमा पुगि उद्धार कार्य जारी रहेको जानकारी गराउँदछौं ।’ सो एयरका प्रवक्ताद्धारा जारी विज्ञप्तिमा भनिएको छ ।
वि.सं.२०७९ जेठ १६ सोमवार १०:३३ मा प्रकाशित
