हामी सबैकाे संसारन्यूज

काठमाडौं । युएईबाट ७६ तोला बढी अवैद्य सुन बोकेर आएका दुई युवा त्रिभुवन विमानस्थलबाट पक्राउ परेका छन् ।

भिजिट भिसामा दुबई गएका गुल्मी घर भई हाल रुपन्देहीको सैनामैना १ मा बस्ने ४२ वर्षीय सुरेश बहादुर शाही र कपिलवस्तुको बाणगंगाँ ८ का सन्दिप चन्द ठकुरी ८ सय ८८ ग्राम (७६ तोला बढी) सुन बोकेर आएको अवस्थामा आइतबार विमानस्थलबाट पक्राउ परेका हुन् ।

एकसाता अघि भिजिट भिसामा दुबई पुगेका उनीहरु फर्किने क्रममा आफुले लगाएको कपडामा सुनको जलप लगाएर अबैद्य सुन बोकेर आएका थिए । काठमाडौं उपत्यका अपराध अनुसन्धान कार्यालयका एसपी बसन्त बहादुर कुँवरका अनुसार उनीहरु यसअघि पनि पटक–पटक तस्करीको सुन ल्याउन दुवई गएको पाइएकोछ ।

जेठ २१ गते दुबईबाट काठमाडौं आएको नेपाल नेपाल वायु सेवा निगमको फ्लाइट नम्बर आरए२३० को जहाजमा केही व्यक्तिहरूले भन्सार छलेर अवैध रूपमा सुन ल्याउदै छन् भन्ने गोप्य सूचनाका आधारमा विमानस्थलमा पुगेर निगरानी गरेको प्रहरीले ठकुरी र शाहीलाई पक्राउ गरेको हो ।

विमानस्थलबाहिर निगरानी गरिरहेको प्रहरीले शाही र ठकुरीले लगाएको सर्ट, पेन्ट तथा अण्डरवेयरका विभिन्न भागहरूमा नदेखिने गरी सुनको पेस्ट बनाई ८८८.९७ ग्राम अवैध सुन ल्याएको अवस्थामा पक्राउ परेका थिए ।

उनीहरु पक्राउ परेपछि प्रहरीले सोहि कार्यमा संलग्न रहेका अन्य पाँचजनालाई पनि पक्राउ गरेको हो ।

पक्राउ पर्नेमा जितपुरसिमरा–१६ बारा हाल काठमाण्डौंको बौद्धमा बस्ने २२ वर्षीया निर्मला घलान, धनुषा बडेश्चर–४ धनुषा घर भइ बुढानिलकण्ठमा बस्ने राहुल भन्ने ४१ वर्षीय बरूण भक्त माथेमा, चीन तिब्बत छेन्दु, हाल बौद्ध बस्ने २७ वर्षीय लोप्साङ ग्याल्सेन, सुनवल–१०, नवलपरासी पश्चिम हाल माछापोखरी बस्ने ४२ वर्षीय युवराज भुसाल र दिल्लीको कृष्णनगर हाल ललितपुरको बागडोल बस्ने भारतीय नागरिक ५१ वर्षीय अमन राजपुतलाई पक्राउ गरी थप अनुसन्धान गरिरहेको प्रहरीले जनाएको छ ।

सो समहका मुख्य नाइके रहेका युवराज भुसालले प्रहरीले नियन्त्रणमा लिनासाथ थप सूचना चुहिने डरले मोबाइल फुटालेको पनि प्रहरीले जनाएको छ । प्रहरीले केमिकल प्रयोग गरेर ती कपडा गालेर सुन निकालेका थिए । यसअघि सुन तस्करका गिरोहहरुले विभिन्न तरिकाले सुन लुकाएर ल्याउने गरेका थिए । प्रहरीका अनुसार यसरी कपडामा जलप लगाएर सुन तस्कर गरेको घटना पहिलो हो ।

दुवईबाट कपडामा सुन लुकाएर ल्याएका दुईसहित सात पक्राउ