हामी सबैकाे संसारन्यूज

काठमाडौं । सानिमा बैंकले भिडियो केवाईसी सेवा सुरु गरेको छ । बैंकले आफ्ना ग्राहकहरुका लागि सो सेवा सुरु गरेको हो । बैंकका अनुसार गैर आवासीय तथा नेपाली मुलका व्यक्तिले विदेशबाटै अनलाइन खाता खोलेर भिडियो केवाईसी गरी आफ्नो खाता सुचारु गर्न सक्नेछन् । बैंकले ग्राहकहरु आफ्नो खाता सुचारु गर्न बैंकसम्म आउनुपर्ने झन्झटबाट मुक्त हुने जनाएको छ ।

भिडियो केवाईसी सेवामार्फत् ग्राहकहरूले सानिमा बैंकको कर्मचारीसंग प्रत्यक्ष रुपमा कुराकानी गरी खाता खोल्दा गर्नुपर्ने अनिवार्य कार्यहरु जस्तै कागजात प्रमाणीकरण, हस्ताक्षर प्रमाणीकरण आदि सरल तरिकाले गर्न सक्ने बताइएको छ । बैंकका अनुसार ग्राहकहरुले अनलाइन खाता खोल्दा भिडियो केवाईसी विकल्प रोजी कर्मचारीसंग प्रत्यक्ष रुपमा कुराकानी गर्न चाहेको मिति र समय तय गर्नुपर्ने हुन्छ ।

भिडियो केवाईसी प्रमाणीकरण स्वीकृत भएको वा नभएको जानकारी ग्राहकलाई इमेल वा फोन कल मार्फत् गरिने बैंकले जनाएको छ । बैंकले भिडियो केवाईसी प्रमाणीकरण प्रक्रियाको स्वीकृत भएपछि ग्राहकले आफ्नोे खातामा रकम जम्मा गर्न तथा खाताबाट वार्षिक रु. १ करोड सम्म खर्च गर्न सक्ने जनाएको छ ।