Sansar News
काठमाडौं । एनआईसी एशिया बैंकले मेसिनबाट जम्मा गर्न सकिने क्यास डिपोजिट सेवा सुरु गरेको छ । बैंकले नगद सोझै मेसिनबाट जम्मा गर्न सकिने क्यास डिपोजिट सेवा सुरु गरेको हो ।
यस सेवा मार्फत अब बैंकका ग्राहकहरुले सहज रुपमा बैंकमा रहेको आफ्नो वा अन्यको खातामा नगद रकम जम्मा गर्न सक्ने बैंकले जनाएको छ । बैंकले सेवाअन्तर्गत बैंकमा गएर कुनै भौतिक फारमविना ग्राहकहरुले खाता नम्बरको आधारमा मेसिनबाट सोझै रकम जम्मा गर्न सक्ने जनाएको छ ।
बैंकका अनुसार मेसिनबाट एक हजार रुपैयाँ र पाँच सय रुपैयाँ दरका नोटहरू मात्र जम्मा गर्न मिल्ने छ । बैंकले एकजना ग्राहकको खातामा एकपटकमा अधिकतम ९९ हजार ५ सय रुपैयाँ गरी दैनिक अधिकतम नौ लाख ९९ हजार पाँच सय रुपैयाँसम्म नगद जम्मा गर्न सकिने जनाएको छ ।
बैंकको यस नयाँ सेवाबाट नगद जम्मा गर्न सेवाग्राहीले उक्त मेसिनमा रकम जम्म गर्न इच्छाएको खाता नम्बर उल्लेख गरेपछि मोबाइल नम्बरमा ओटीपी प्राप्त गर्ने बताइएको छ । उक्त ओटीपी मेसिनमा उल्लेख गरेर भेरिफाइ भएपछि रकम जम्मा गर्ने प्रक्रिया प्रारम्भ हुने बैंकले जनाएको छ ।
उक्त मेसिनमा आफूले जम्मा गर्न चाहेको नगद रकम राखेपछि मेसिनले सो रकम गनेर खातामा तत्काल सहज रुपमा जम्मा गरिदिने र त्यसको जानकारी समेत एसएमएस तथा रिसिप्ट मार्फत उपलब्ध हुने व्यवस्था बैंकले गरेको बताइएको छ ।
बैंकले यो सेवा हाल न्यूरोड बिशालबजार शाखामा सञ्चालन गरेको र यस सेवालाई निकट भविष्यमा देशका अन्य शाखाहरूमा समेत विस्तार गर्ने योजना बनाइरहेको बताइएको छ । साथै बैंकले दैनिक रुपमा रकम झिक्न र बचत गर्न सकिने क्यास रिसाइकलर मेसिनबाट समेत सेवा सुचारु गरिसकेको जनाएको छ ।
वि.सं.२०७९ साउन १३ शुक्रवार १५:१८ मा प्रकाशित
