हामी सबैकाे संसारन्यूज

काठमाडौं । निलम्बित प्रधानन्यायाधीश चोलेन्द्र शमशेर राणाको दोस्रो दिनको बयान जारी छ । सिंहदरबारमा महाअभियोग सिफारिस समिति बैठकमा उनको बयान सुरु भएको हो ।

बुधबारबाट सुरु गरिएको उनको बयान बिहीबार पनि जारी छ । ११ सदस्यीय संसदको महाभियोग अध्ययन तथा सिफारिस समितिले चोलेन्द्रलाई सोध्न ४३ वटा लिखित प्रश्न तयार पारेको छ । बुधबार तीमध्ये ४ वटा मात्र प्रश्न सोधिएको छ । अझै ३९ प्रश्न सोध्न बाँकी छ ।नेपाल बार एसोसिएसनले राख्ने २१ प्रश्न पनि चोलेन्द्रलाई सोधिने छ ।

गत १ फागुनमा सत्तारुढ दलका सांसदहरुले चोलेन्द्रविरुद्ध महाअभियोगको प्रस्ताव प्रतिनिधिसभामा दर्ता गरेका थिए । प्रतिनिधिसभाले गठन गरेको महाअभियोग सिफारिस समितिले उनको बयान लिन थालेको हो ।

बुधबारको बयानमा उनले महाअभियोग प्रस्ताव नै निस्क्रिय भइसकेको र न्यायाधीश, बार पदाधिकारी र राजनीतिक दलका नेतामाथि गम्भीर आरोप लगाएका थिए ।