हामी सबैकाे संसारन्यूज

काठमाडौं । सीबीआईएल क्यापिटलले लगानी व्यवस्थापन सेवा अन्तर्गत नयाँ योजना सीबीआईएल पोर्टफोलियो अफ म्युचुअल फण्ड शुरु गरेको छ । यो फण्ड नविनतम् अवधारणमा आधारित योजना हो ।

जसले ग्राहकलाई भिन्न किसिमको लगानीको अनुभव प्रदान गर्दै कम जोखिममा उच्च प्रतिफल प्रदान गर्ने लक्ष्य लिएको क्यापिटलले जनाएको छ ।

यो योजना अन्तर्गत लगानीकर्ताले न्यूनतम तीन लाख रुपैयाँ लगानी गर्नु पर्ने क्यापिटलले जनाएको छ । जसको अवधि २ वर्षको हुने छ । साथै, वार्षिक सेवा शुल्क ०.५० प्रतिशत रहेको समेत क्यापिटलले जनाएको छ ।

क्यापिटलका अनुसार यो योजनाका विभिन्न विशेषताहरु छन् । दक्ष तथा योग्य जनशक्तिद्वारा संचालित यो योजनाको अनलाइन मार्फत दैनिक रुपमा लगानी व्यवस्थापनको प्रतिवेदन हेर्न मिल्ने छ । त्रैमासिक रुपमा लगानी व्यवस्थापनको प्रतिवेदन हुने र सामुहिक लगानी कोषहरु तथा प्राथमिक निष्काशन (आईपीओ तथा एफपीओमा) लगानी गर्ने छ ।

यो योजनाअन्तर्गत दक्ष तथा योग्य जनशक्तिद्वारा सामुहिक लगानी कोषहरुको पोर्टफोलियो नियमित निगरानी गरी ग्राहकहरुको जोखिम प्रोफाइल, लगानी रकम र लक्ष्यका आधारमा अनुकूलित पोर्टफोलियो तयार पारि लगानी गरिन्छ ।

यो सेवा लिनको लागि ग्राहकले बाटुलेघरस्थित सीबीआईएल क्यापिटल वा सिटिजन्स बैंकको डिल्लीबजारस्थित कार्यालयमा सम्पर्क गर्न सक्ने क्यापिटलले जनाएको छ ।