हामी सबैकाे संसारन्यूज

काठमाडौं । क्रिकेटर सन्दीप लामिछानेविरुद्व जबरजस्ती करणी गरेको अभियोगमा जाहेरी दर्ता भएको छ । उनीविरुद्ध नाबालिगलाई बलात्कार गरेको अभियोगमा प्रहरी वृत्त गौशालामा जाहेरी दर्ता भएको थियो । लामिछानेविरुद्ध १७ वर्षीया किशोरीले पटक–पटक बलात्कार गरेको आरोप लगाएकी छिन् ।

पीडित भनिएकी किशोरीका अभिभावकले मंगलबार महानगरीय प्रहरी वृत्त, गौशालामा जाहेरी दिएका हुन् । जाहेरीमा गत भदौ ५ गते काठमाडौं र भक्तपुरका विभिन्न ठाउँमा लगेर र त्यसको भोलिपल्ट गौशाला क्षेत्रमा रहेको एक होटेलमा लगी बलात्कार गरेको आरोप लगाएको छ ।

जाहेरी दर्ता भएसँगै प्रहरीले अनुसन्धान प्रक्रिया अगाडि बढाएको छ । प्रहरीले पीडित भनिएकी युवतीको मंगलबार नै स्वास्थ्य परीक्षण गरेको थियो । साथै, बलात्कार भएको भनिएको विभिन्न स्थानको सीसी टीभी फुटेज पनि प्रहरीले संकलन गर्न थालेको छ ।

पीडित भनिएकी युवतीले स्न्याप च्याटमार्फत लामिछानेसँग कुराकानी भएको र उनले भेट्न बोलाएर बलात्कार गरेको जाहेरी दिएकी छिन् ।

हाल लामिछाने क्यारेबियन प्रिमियर लिग खेल्न वेस्ट इन्डिजमा छन् । उनी केन्यासँगको ट्वान्टी–२० अन्तराष्ट्रिय श्रृंखलापछि क्यारेबियन प्रिमियर लिग खेल्न त्यसतर्फ गएका हुन् ।

आरोेप प्रमाणित १२ वर्षसम्मको जेल

क्रिकेटर लामिछानेमाथि लागेको अभियोग पुष्टि भए बलात्कार गरेको अभियोगमा मात्रै १० देखि १२ वर्षसम्म कैद सजायँ हुनसक्छ । मुलुकी अपराध संहिताको दफा २१९ को जबरजस्ती करणी गर्न नहुने कसूरको उपदफा (३) (घ) मा पीडित १६ वर्षदेखि माथि १८ वर्षसम्म भए १० देखि १२ वर्षसम्म कैद सजाय हुने उल्लेख छ ।

साथै, बालिका १८ वर्षभन्दा कम उमेरकी भएको कारणले उनीविरुद्धको अभियोगमा मुलुकी अपराध संहिता २०७४ को दफा २५५ पनि आकर्षित हुन्छ । उनीविरुद्ध बालयौन दुरुपयोग गरेको अभियोग पनि लाग्छ । त्यस्तो अभियोग प्रमाणित भए तीन वर्षसम्म कैद र ३० हजार रुपैयाँसम्म जरिवाना हुनसक्छ । मंगलबार मात्रै सोही अभियोगमा अभिनेता पल शाललाई अदालतले साढे २ वर्ष कैद सजायको फैसला सुनाएको थियो ।

सम्बन्धित समाचार

सन्दीप लामिछानेविरुद्ध प्रहरीमा बलात्कारको उजुरी