हामी सबैकाे संसारन्यूज

काठमाडौं । नेपाल टेलिकमले आज असोज ४ गतेदेखि इम्बेडेड सिम (इ-सिम) सुन्धारासहित अन्य ७ स्थानबाट इ-सिम बिक्री वितरण गर्ने भएको छ । टेलिकमले नक्साल, चाबहिल, ठिमी, भक्तपुर, पाटन, गोंगबु र छाउनी कार्यालयबाट पनि इ-सिम बिक्री गर्ने भएको हो ।

टेलिकमले यसअघि सुन्धारामा रहेको ग्राहक सेवा केन्द्रबाट मात्रै सिमकार्ड बिक्री गरिरहेको थियो । टेलिकमले आफूसँग इ-सिम मौज्दात रहेको पनि जनाएको छ।

टेलिकमका अनुसार मोबाइल सेटमा इ-सिम इन्स्टल गर्नका लागि क्यूआर कोडमार्फत स्क्यान गर्नुपर्छ । क्यूआर कोडको सुविधा भएका पछिल्लो पुस्ताका मोबाइल सेटमा मात्र इ-सिम प्रयोग गर्न सकिन्छ ।

टेलिकमले सबैभन्दा पहिले आफ्नो मोबाइल सेटमा इ–सिम चल्ने/नचल्ने यकिन गरेर मात्र इ-सिमका लागि कम्पनीका ग्राहक सेवा केन्द्रमा जान आग्रह गरेको छ । यसका लागि आफ्नो मोबाइलबाट ८३०६३ डायल गर्नुपर्ने टेलिकमले जनाएको छ । साथै, टेलिकमले यसरी डायल गर्दा इआइडी लेखिएको संकेतसहित नम्बरहरु देखियो भने उक्त सेटमा इ-सिम चल्ने जनाएको छ ।

टेलिकमले आइफोन र एन्ड्रोइड सिस्टमयुक्त मोबाइल सेटको सेटिङमा भएका विभिन्न अप्सन हेरेर पनि इ–सिम चल्ने वा नचल्ने पत्ता लगाउन सकिने जनाएको छ । आइफोन वा एन्ड्रोइडको सेटिङमा एड मोबाइल प्लान वा एड डेटा प्लान देखियो भने पनि त्यसमा सामान्यतः इ-सिम चल्छ भन्ने कुरा थाहा हुने टेलिकमले जनाएको छ ।

टेलिकमले फिजिकल सिम प्रयोग गरिरहेका कम्पनीका ग्राहकहरुका पोस्टपेड र प्रिपेड सिम हालका लागि निःशुल्क इ-सिममा परिवर्तन गर्ने सुविधा दिइरहेको जनाएको छ । साथै, नयाँ पोस्टपेड लिन चाहने ग्राहकलाई हालको बिक्री मूल्यमै इ-सिम उपलब्ध गराइ रहेको र नयाँ प्रिपेड सिमकार्ड लिन चाहने ग्राहकका लागि भने निकट भविष्यमा सो सिम उपलब्ध गराइने टेलिकमले जनाएको छ ।