हामी सबैकाे संसारन्यूज

काठमाडौं । सत्तारुढ दल नेपाली कांग्रेसभित्रको आन्तरिक विवाद चर्किएको छ । समानुपातिक निर्वाचन प्रणालीको बन्दसूचीमा संस्थापन पक्षले मनोनानी गरेको भन्दै शेखर कोइराला नेतृत्वको समूह विद्रोहमा उत्रिएको छ । समूहले पार्टी नेतृत्वविरुद्ध आन्दोलनका कार्यक्रम नै घोषणा गरेको छ ।

काठमाडौं ठमेलस्थित होटल यात्रीमा सोमबार सम्पन्न कोइराला समूहको भेलाले असोज १२ देखि आन्दोलनका कार्यक्रम घोषणा गरेको हो । समूहले असोज १२ गते पार्टी केन्द्रीय कार्यालयमा धर्नामा बस्ने निर्णय गरेको छ ।

समूहले समानुपातिक सूची नसच्याए १४ गतेदेखि पुनः अर्को आन्दोलन गर्ने बताएको छ । समूहले १४ गतेपछिको आन्दोलन भने कठोर हुने बताएको छ । यद्यपि, समूहले उक्त आन्दोलन कस्तो हुने खुलाएको छैन ।

४० प्रतिशतको बारगेनिङ्ग

कांग्रेस नेतृत्वले समानुपातिकको सूची तयार गरेसँगै कोइराला नेतृत्वको समूह विरोधमा उत्रिएको थियो । समूहले आफ्नो पक्षमाथि अन्याय गरिएको बताउँदै आएको छ । समूहले समानुपातिकमा ४० प्रतिशत हिस्सा पाउनुपर्ने बताउँदै आएको छ ।

समूहले प्रतिनिधिसभा र प्रदेशसभामा निर्वाचनमा उम्मेदवार तय गर्दा कम्तीमा ४० प्रतिशतको माग गरेको छ । संस्थापन पक्षले २० प्रतिशत दिने तयारी गरिरहेका बेला कोइराला समूह विरोधमा उत्रिएको हो । समूहले ४० प्रतिशत नदिए आफ्नो तर्फबाट उम्मेदवार नै नउठाउने पनि बताएको छ ।

तर, कोइराला समूहभित्रै पछिल्लो समय भने विवाद छ । पार्टी नेतृत्वमा रहेका नेताहरु धनराज गुरुङ, गगन थापा, बद्री पाण्डे, जीवन परियारलगायत पछिल्ला बैठकहरुमा सहभागि छैनन् ।

सम्बन्धित समाचार

कांग्रेसभित्र चर्कियो विवाद, गठबन्धनको भविष्य अन्योलमा