हामी सबैकाे संसारन्यूज

काठमाडौं । खानेतेल बेच्ने बाबा भेजिटेबल इन्डस्ट्रिजको कारोबार ३८ प्रतिशतले बढेको छ । भारततर्फ खानेतेल निर्यातमा केन्द्रित यो कम्पनीले २०२१/२२ मा ७ अर्ब ५९ करोड २० लाख रुपैयाँको व्यापार (अपरिष्कृत) गरेको छ ।

बाबा तेल उद्योगले गत वर्ष २०२१ मा ५ अर्ब ५१ करोड ९० लाख रुपैयाँको कारोबार गरेको थियो । २०२० मा कारोबार रकम ३ अर्ब ९ करोड ३० लाख रुपैयाँ थियो भने २०१९ मा दुई अर्ब १७ करोड १० लाख रूपैयाँ थियो ।

मोरङमा प्रशोधन उद्योग रहेको बाबा तेल उद्योगसँग कुल ४५ हजार टन भटमास, पामोलिन, सूर्यमुखी र पाम आयल उत्पादन गर्ने क्षमता छ ।
उद्योगले सिद्धबाबा ब्राण्डबाट स्वदेशी बजारमा तेल बिक्री गर्दै आएको छ । उद्योगले भारतमा समेत तेल निकासी गर्दै आएको छ । २०२२ मा उद्योगले कुल बिक्रीको ८० प्रतिशत निर्यातबाट आर्जन गरेको रेटिङ एजेन्सी केयर रेटिङ्स नेपालले जनाएको छ ।

उद्योगले गर्ने कुल आम्दानीमा तेल निर्यातको हिस्सा नै अधिकांश रहेको देखिन्छ । उद्योगले २०२० मा दुई अर्ब १९ करोड ७० लाख रुपैयाँको तेल निर्यात गरेकोमा २०२१ मा बढाएर तीन अर्ब ९७ करोड १० लाख रुपैयाँ पु¥याएको थियो ।

भारतीय सीमाभन्दा १५ किलोमिटर वर बाबा तेलको उद्योग रहेकाले निकासीका लागि ढुवानी लागतमा यस उद्योगलाई प्रतिस्पर्धात्मक लाभ मिलेको छ ।

यसैका कारण उद्योगको आम्दानीमा यसको प्रत्यक्ष प्रभाव परेको बताइएको छ । कम्पनीको वित्तीय जोखिम क्रमशः हट्दै गएको केयर रेटिङ्स नेपालले जनाएको छ । उद्योगको कुल संचालन नाफा, नाफाको मार्जिन, पुँजीको संरचनालगायतका सूचकमा सुधार आएकाले वित्तीय जोखिम हट्दै गएको बताइएको छ ।

उद्योगमा प्रकाशकुमार मुन्दडा र सुरेश कुमार राठीको लगानी छ । कम्पनीले केयर रेटिङ्स नेपालबाट २ अर्ब ६ करोड ५० लाख रुपैयाँको अल्पकालीन कर्जाका लागि एनपी एथ्री रेटिङ पुनःपुष्टि गराएको छ ।