हामी सबैकाे संसारन्यूज

काठमाडौं । लामो समयसम्म रोकिएको कोरोना बीमाको दावी भुक्तानीको लागि अर्थमन्त्रालयले रकम निकासा गरेको छ । सोसँगै बीमितहरुलाई पहिलो चरणमा एक अर्ब ८१ करोड रुपैयाँ भुक्तानी गरिने भएको छ । सरकार, बीमा समिति, बीमा कम्पनी र नेपाल पुनर्बीमा कम्पनी मिलेर कोरोनाको बीमितहरुलाई दाबी भुक्तानी गर्ने भएका हुन् । भुक्तानी प्रकृयामा सरकारको ५५ प्रतिशत, बीमा समितिको ८ प्रतिशत, बीमा कम्पनीहरुको २५ प्रतिशत र बाँकी १२ प्रतिशत नेपाल रिको रहने भएको छ ।

कोरोना बीमा भुक्तानी प्रकृयामा सबैभन्दा बढी भार पुनर्बीमा कम्पनीलाई पर्ने देखिन्छ । मर्जमा गई एकीकृत कारोबार गरिसकेका कम्पनीले दुबै कम्पनीको तिर्नुपर्ने भएकाले उक्त कम्पनीलाई पनि भुक्तानी प्रकृयामा बढी भार पर्ने देखिएको छ । दावी भुक्तानीको सन्दर्भमा सरकार आफ्नो प्रतिवद्धताअनुसार अगाडि नबढेको कम्पनीहरुले गुनासो गरेका छन् ।

कम्पनीहरुको नाफामा असर परेपनि बीमितले दावी भुक्तानी पाउनु राम्रो विषय भएको नेपाल बीमक संघका अध्यक्ष चंकी क्षेत्रीको प्रतिक्रिया छ । कोरोना बीमा मापदण्ड, २०७७ अनुसार सरकारले आफ्नो दायित्व अनुसारको रकम निकासा नगर्दा सो क्षेत्रमा असर परेको उनले बताएका छन् ।

कोरोना बीमाका बीमितलाई करिब ११ अर्ब रुपैयाँ भुक्तानी गर्न रहेको छ । तर सरकारले अहिले १ अर्ब रुपैयाँ मात्रै निकासा गरेको छ । त्यसमा बीमा समिति, नेपाल पुनर्बीमा कम्पनी र सबै कम्पनीहरुले थपेको रकम सहित एक अर्ब ८१ करोड रुपैयाँ भुक्तानी हुने भने त्यसपछि ९ अर्ब रुपैयाँ दावी भुक्तानी गर्न बाँकी रहन्छ । दावी भुक्तानीको पहिलो किस्ता र अन्य बाँकी भुक्तानी गर्दा निर्जीवन कम्पनीहरुको २ वर्षको नाफामा असर पर्ने देखिएको छ । जुन असरका कारण ती कम्पनीमा लगानी गर्नेहरुले आगामी २ वर्षसम्म लाभांश नपाउने अनुमान गरिएको छ ।

दावी भुक्तानी प्रकृया कसरी कार्यान्वयन गर्ने भन्ने विषयको मोडालिटी अर्थ मन्त्रालयले नै तय गरेको छ । अहिले तय भएको मोडालिटीअनुसार दावी भुक्तानी गर्दा पहिलो प्राथमिकता व्यक्तिगत बीमितलाई दिइने जनाइएको छ । सो मध्ये पनि पहिला दावी गर्नेहरुलाई पहिला भुक्तानी गर्ने र पछि दावी गर्नेहरुलाई पछि भुक्तानी गर्ने तयारी भइरहेको छ । व्यक्तिगत दावी भुक्तानीपछि संस्थागत रुपमा बीमा गरी दावी गरिएका र निजामती कर्मचारीहरुलाई भुक्तानी गरिने जनाइएको छ ।