Sansar News
काठमाडौं । निर्वाचन आयोगले मंसिर ४ गते सम्पन्न भएको प्रतिनिधि सभा र प्रदेश सभा निर्वाचनका लागि लागू गरिएको निर्वाचन आचार संहिता आजदेखि खारेज भएको जनाएको छ ।
आयोगका प्रवक्ता शालिग्राम शर्मा पौडेलले सोमबारदेखि ‘निर्वाचन आचार संहिता’ खारेज भएको जानकारी दिएका छन् ।
प्रवक्ता पौडेलद्धारा जारी विज्ञप्तिमा भनिएको छ, ‘२०७९ मंसिर ४ गते सम्पन्न प्रतिनिधि सभा सदस्य तथा प्रदेशसभा सदस्य निर्वाचनका लागि निर्वाचन आयोग ऐन, २०७३ को दफा २२ ले दिएको अधिकार प्रयोग गरी निर्वाचन आयोगबाट जारी गरिएको निर्वाचन आचारसंहिता, २०७९ आज मंसिर २६ गतेदेखि लागू नरहने निर्णय भएको छ ।’
उक्त निर्वाचन आचार संहिता १२ असोजदेखि देशैभरी लागू गरिएको थियो ।
उक्त निर्णयको जानकारी प्रधानमन्त्री तथा मन्त्रिपरिषद्को कार्यालय, सम्पूर्ण मन्त्रालयहरू तथा संवैधानिक निकायहरूमा गराइएको पनि आयोगले जनाएको छ ।
वि.सं.२०७९ मंसिर २६ सोमवार १४:२७ मा प्रकाशित
